भक्तपुर, १८ साउन । भक्तपुरको कौशलटारमा बिहीबार राती एक फ्याक्ट्रीमा आगलागी हुँदा दुई करोड ६० लाख रुपैयाँ बराबरको क्षति भएको छ ।
कौशलटार अमिनिटी स्कुल नजिकै शंकर कटुवालको चार तले पक्की घरको भुईँ तलामा रहेको नाशा ईन्टेरियर कम्पनी नामको आल्मुनियम र फर्निचर फ्याक्ट्रीमा बिहीबार राती १०:२० बजे आगलागी भएको थियो ।
विद्युत् सर्ट भएर लागेको आगो निभाउनको लागि काठमाडौँ, ललितपुर र भक्तपुरका गरी पाँच वटा दमकल प्रयोग भएका थिए ।
सुरक्षा निकाय, स्थानीय र पाँच वटा दमकलको सहयोगमा उक्त आगो राती ११:४७ मा पूर्ण रूपले नियन्त्रणमा लिइएको थियो ।
आगलागीमा अन्दाजी दुई करोड ६० लाख बराबरको क्षति भएको जिल्ला प्रहरी परिसर भक्तपुरका प्रवक्ता प्रहरी नायव उपरीक्षक राजन कार्कीले जानकारी दिए ।
आगलागीका कारण छिमेकीको घरमा समेत क्षति पुगेको बताइएको छ । प्रत्यक्षदर्शीका अनुसार आगलागी हेर्न जम्मा भएको ठुलो भिडभाडका कारण आगो नियन्त्रणमा लिन केही ढिला भएको हो ।
