सुनसरी, ६ भदौ । धनकुटाबाट धरानतर्फ आउँदै गरेको ट्रकमा ठुलो परिमाणमा गाँजा भेटिएको छ ।
आज बिहान धरान उप-महानगरपालिका-१३ साराङग स्थितबाट ठुलो परिमाणमा ट्रकमा लोड गरेर ल्याउँदै गरेको गाँजा प्रहरीले बरामद गरेको हो ।
विशेष सूचनाको आधारमा इलाका प्रहरी कार्यालय धरानबाट खटिएको प्रहरी टोलीले को १ ख ४७३३ नम्बरको ट्रकलाई रोकेर चेकजाँच गर्दा ट्रकमा गाँजा भेटिएको हो ।
सुनसरी प्रहरीले दिएको जानकारी अनुसार मुलाको बोरासँगै लोड गरिएको ४४ वटा सेतो बोरामा लुकाई छिपाई ल्याउँदै गरेको अवस्थामा एक हजार ४२० किलो लागुऔषध गाँजा भेटिएको हो ।
ट्रकमा सवार मोरङको सुन्दर हरैचा नगरपालिका-७ गछियाका ३४ वर्षीय राज कुमार दाहाल र धनकुटाको सहिदभुमी गाउँपालिका-७ का ४१ वर्षीय भुपेन्द्र राईलाई नियन्त्रणमा लिएको छ ।
नियन्त्रणमा लिइएको गाँजा, ट्रक र मानिसहरूको सम्बन्धमा इलाका प्रहरी कार्यालय धरानबाट आवश्यक अनुसन्धान भई रहेको छ सुनसरी प्रहरीले जनाएको छ ।
