मोरङ । वैदेशिक रोजगारीको लागि जापान पठाइदिन्छु भन्दै ३५ जना युवायुवतीबाट करोडौँ रुपैयाँ ठगेका एक व्यक्ति पुर्पक्षको लागि कारागार चलान भएका छन् ।
विगत चार वर्षदेखि जापानमा बस्दै आएका मोरङ सुनवर्षी नगरपालिका वडा नं.-६ बस्ने वर्ष ३५ को अजय कुमार राजवंशीलाई जिल्ला अदालतले पुर्पक्षको लागि कारागार पठाउने आदेश दिएको हो ।
राजवंशीले ३५ जना व्यक्तिहरूलाई जापान पठाइदिन्छु भन्दै दुई करोड ५८ लाख ७५ हजार रुपैयाँभन्दा बढी ठगी गरेका थिए ।
रकम लिएर सम्पर्कविहीन भएका राजवंशीलाई जिल्ला प्रहरी कार्यालय मोरङबाट खटिएको प्रहरी टोलीले जेठ ०५ गते पक्राउ गरेको मोरङ प्रहरी प्रवक्ता प्रहरी नायव उपरीक्षक रन्जन कुमार दाहालले बताए ।
पक्राउ परेका राजवंशीलाई मोरङ जिल्ला अदालतका न्यायाधीश दीनबन्धु बरालले जेठ ३१ गते पुर्पक्षको लागि थुनामा पठाउने आदेश दिएको अदालतका सूचना अधिकारी हेम बहादुर बुढाथोकीले केटिएम दैनिकलाई बताए ।
