झापा । लागुऔषध ब्राउन सुगर सेवन गरिरहेको अवस्थामा झापाबाट प्रहरीले तीन युवालाई पक्राउ गरेको छ ।
जिल्लाको कनकाई नगरपालिका-२ जामुनखाडी सिमसार बस्ने बर्ष अं.४० को भानु दाहालको घरको कोठा भित्र लागुऔषध सेवन भइरहेको भन्ने सुचनाको आधारमा ईलाका प्रहरी कार्यालय सुरुङगाबाट खटिएको प्रहरी टोलीले तीन जनालाई पक्राउ गरेको हो ।
पक्राउ पर्नेमा भानु दाहाल, इलाम माई नगरपालिका-८ बस्ने वर्ष ३९ को आश बहादुर लिम्बु र सोही स्थानमा घर भएका वर्ष ३२ को उमेश राईलाई प्रहरीले पक्राउ गरेको हो।
उनीहरूको साथबाट लागुऔषध ब्राउन सुगर जस्तो देखिने लिसाइलो पदार्थ ५ ग्राम ३०० मिलिग्राम, नगद रु ३४ हजार, तीन थान मोवाईल र आश बहादुर राईको नाममा रहेको मे.९ प.९२९६ नं.को पल्सर मोटरसाईकल फेला परेको जिल्ला प्रहरी कार्यालय झापाका प्रवक्ता प्रहरी नायव उपरीक्षक खगेन्द्र प्रसाद रिजालले बताए ।
तीनैजनालाई इलाका प्रहरी कार्यालय अनारमनीमा राखी थप अनुसन्धान कार्य भई रहेको डिएसपी रिजालले बताए ।
