काठमाडौं । सत्ता गठबन्धनबाट आवद्ध दलहरूमध्ये दुईवटा दलबाट उपराष्ट्रपतिको लागि उम्मेदवारी दर्ता भएको छ । जनमत पार्टीकी ममता झाले उपराष्ट्रपतिमा उम्मेदवारी दर्ता गराएकी छिन् भने जनता समाजवादी पार्टी नेपालबाट रामसाहप्रसाद यादवले उम्मेदवारी दर्ता गरेका हुन् ।
उनीहरू नयाँ बानेश्वरस्थित संसद् भवनको ल्होत्से हलमा पुगेर उम्मेदवारी दर्ता गराएका हुन् । सत्तारुढ गठबन्धनले जनमत पार्टीकी ममता झालाई आज बिहान उपराष्ट्रपति बनाउने निर्णय गरेको थियो । जसपा र जनमतबीच आन्तरिक टकराव भएकाले पनि कुनै हालतमा एक अर्काले उम्मेदवारी फिर्ता नलिने बताइन्छ ।
सहमति नबनेपछि जनमत र जसपाबाट दुवै जनाले उम्मेदवारी दिने सहमति भएको थियो । यद्यपि एक जनालाई उम्मेदवारी फिर्ता लिन लगाउने प्रयास भइरहेकोसमेत बुझिएको छ ।
निर्वाचन आयोगले महिला उम्मेदवारी दर्ता गराउन भनेकाले जसपाको तर्फबाट दुइटा उम्मेदवारी दिइने बताइएको छ। अर्को उम्मेदवारी प्रमिला कुमारीले दिनेछिन्।
उता नेकपा एमालेबाट अष्ट्रलक्ष्मी शाक्यले उम्मेदवारी दर्ता गराइसकेकी छन् ।