काठमाडौँ । प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल “प्रचण्ड” ले परराष्ट्रमन्त्री विमला राई पौड्यालको विदेश भ्रमण रोकिदिएका छन् ।
मन्त्री पौडेल मानवाधिकार परिषद्को ५२औँ सत्रमा भाग लिन आज स्वीट्जरल्याण्डको जेनेभा प्रस्थान गर्ने कार्यक्रम थियो ।
मन्त्री निकट स्रोतका अनुसार “मन्त्रीज्यू बिहानसम्म जाने भनेर तयारीमा हुनुहुन्थ्यो, साँझ अचानक प्रधानमन्त्रीले खबर पठाएपछि रोकिनुभयो ।”
यसअघि आइतबार बिहान भ्रमणको तयारीका क्रममा मन्त्री पौडेलले जेनेभा भ्रमणका क्रममा राष्ट्रिय मानवअधिकार आयोगलाई क श्रेणीमै कायम राख्न पहल गर्ने बताएकी थिइन् ।
मानवअधिकार संस्थाहरूको अन्तर्राष्ट्रिय सञ्जाल (गानरी) ले नेपालको मानवअधिकार आयोगलाई ख श्रेणीमा घटुवा गर्न सिफारिस गरेको थियो ।
नेपाल परिषद्को सदस्य राष्ट्र हो । भ्रमणका क्रममा विभिन्न द्विपक्षीय भेटवार्ता हुने, परिषद्का उच्चायुक्त, आइएलओका महानिर्देशकलगायतसँग समेत भेट हुने बताइएको थियो ।
तर नेपालमा पछिल्लो समय विकसित भएको नयाँ गठबन्धनको असरले परराष्ट्रमन्त्रीको विदेश भ्रमण रोकिएको हो ।
मन्त्री डा. पौड्याल नेतृत्वको प्रतिनिधिमण्डल परिषद्को सम्मेलनमा सहभागी भएपश्चात् यही फागुन १९ गते जेनेभाबाट कतारको दोहा प्रस्थान गर्ने कार्यक्रम थियो ।
दोहामा अतिकम विकसित मुलुकहरु (एलडिसिज)को पाँचौँ सम्मेलनमा सुरु हुँदैन । सो सम्मेलनमा प्रधानमन्त्री पुष्पकमल दाहाल ‘प्रचण्ड’ नेतृत्वको प्रतिनिधिमण्डलले शुक्रबार त्यसतर्फ प्रस्थान गर्ने कार्यक्रम छ ।
