काठमाडौं । नेकपा (एकीकृत समाजवादी)का अध्यक्ष माधवकुमार नेपाललाई सहमतिय राष्ट्रपति प्रस्ताव गर्दै तीन दलले नेपाली कांग्रेस र नेकपा (एमाले)सँग आज छलफल गर्ने भएका छन् ।
हिजो साँझ भएको नेकपा (माओवादी केन्द्र), नेकपा (एकीकृत समाजवादी) र जनता समाजवादी पार्टी नेपाल(जसपा नेपाल) बीचको भद्र सहमति अनुसार भावी राष्ट्रपतिका लागि नेपालको नाममा सहमति खोज्न कांग्रेस र एमालेसँग छलफल गर्न लागिएको हो ।
माओवादी संसदीय दलको कार्यालयमा बसेकाे तीन दलको बैठकले नेपाललाई राष्ट्रपतिको उम्मेदवारका रूपमा अघि सार्ने सहमति गरेको थियो । सोही सहमति अनुसार अन्य दलसँग सहमति खोज्नका लागि छलफल गर्न लागिएको नेताहरुले बताएका छन् ।
‘राष्ट्रपतिका लागि माओवादीले भन्दै आएको राष्ट्रिय सहमतिको पात्रमध्ये माधव नेपालजी पनि एक हुनुहुन्छ । उहाँको नामलाई पनि सहमतिका लागि एउटा एजेण्डाका रूपमा अघि सार्ने बैठकमा छलफल भएको छ,’ माओवादी केन्द्रका उपमहासचिव जनार्दन शर्माले हिजो सञ्चारकर्मीसँग भने, ‘भोलि अन्य दलहरूसँग छलफलमा उहाँको नाम पनि एउटा एजेण्डाको रूपमा रहनेछ ।’
उनका अनुसार भावी नेपालको नाम प्रस्ताव गरेर कांग्रेस र एमालेसँग सहमति खोजिने भएको हो । नेकपा एसको बुधवार बसेको सचिवालय बैठकले राष्ट्रपतिका लागि पार्टीको तर्फबाट उम्मेदवारी दिने औपचारिक निर्णय गरिसकेको छ । नेकपा एसमात्रै यस्तो पार्टी हो, जसले भावी राष्ट्रपतिका लागि पहलकदमी गर्ने औपचारिक निर्णय गरेर बसेकाे छ ।
जसअनुसार नेकपा एसले आफनो पार्टी (माधव नेपाल)को नाममा सहमति खोज्नका लागि हिजो साँझ माओवादी केन्द्र र जसपाबीच छलफल गरेको हो । सो छलफल सकारात्मक भएपछि कांग्रेस र एमालेसँग छलफल गर्न लागिएको हो ।