उपप्रधान तथा गृहमन्त्री रवि लामिछानेको नागरिकता सम्बन्धि विवादको मुद्दा सर्वोच्च अदालतको सवैधानिक इजलासमा जारी वहस सम्पन्न भएको छ । सुनवाइ सकिएसँगै आजै आदेश जारी गर्ने सर्वोच्च अदालतको तयारी छ ।
लामिछानेको सांसद हुने योग्यतामाथि प्रश्न उठाउँदै दायर रिट निवेदनमाथि सुनुवाइ भएको हो । उक्त रिटमाथि पक्ष/विपक्षमा वकिलहरुले वहस गरेका थिए ।
कामु प्रधानन्यायाधीश हरिकृष्ण कार्की, न्यायाधीशहरु ईश्वरप्रसाद खतिवडा, आनन्दमोहन भट्टराई, अनिलकुमार सिन्हा र प्रकाशमान सिंह राउतको इजलासमा रिट निवेदकको तर्फबाट वहस गरेका कानुन व्यवसायीहरुले लामिछानेको नेपाली नागरिकता नभएकाले उनको सांसद पद खारेज हुनुपर्ने बताएका थिए ।
रिट निवेदक युवराज पौडेल सफलको तर्फबाट वहस गर्दै अधिवक्ता सुरेन्द्र भण्डारीले गृहमन्त्रीसमेत रहेका रवि अमेरिकी नागरिक नै रहेको तर्क गरेका थिए । उनले अमेरिकी पासपोर्टमा भिसा लगाएर आएको व्यक्तिलाई नेपाली नागरिक मान्न नसकिने बताएका थिए ।
‘रवि लामिछाने अमेरिकी पासपोर्टमा भिसा लिएर नेपाल आएका हुन् । यो कुराले उनी गैरनेपाली हुन् भन्ने पुष्टि गर्छ, भण्डारीको भनाइ छ– ‘नेपाली नागरिकले नेपाल आउँदा त भिसा लिनु पर्दैन नि । अमेरिकी पासपोर्टमा आएका उनले नेपाल आउँदा राष्ट्रियता पनि अमेरिकी भनेर जनाएका छन् ।’
‘रविले यसअघि दिएको जवाफमा नेपालको औधि माया भएको बताएका छन्’, उनले वहसका क्रममा भनेका थिए– ‘तर रविले नेपाल आउने बित्तिकै किन अमेरिकी नागरिकता र पासपोर्ट त्यागेनन् रु तीन वर्षसम्म किन राखेर अमेरिकी नागरिककै रुपमा काम गरिरहे ?’
अधिवक्ताहरु अमृत खरेल, रमण कर्ण लगायतले अमेरिकाबाट फर्किने क्रममा गैरपर्यटक भिसामा आएको र त्यसपछि नेपाली नागरिकता लिएको प्रमाण पेश नभएकाले पनि उनी नेपाली नागरिक नभएको बताएका थिए ।
सह–न्यायाधिवक्ता सञ्जिव रेग्मीले भने लामिछानेको नागरिकताबारे कुनै निर्णय नगरेकाले अन्तरिम आदेश जारी गर्नु नपर्ने बताएका थिए ।
