हालै सम्पन्न प्रदेशसभा निर्वाचनवाट तीनवटा नयाँ पार्टीले प्रदेश सभामा प्रतिनिनिधित्व गरेका छन् । निर्वाचन आयोगले सार्वजनिक गरेको मतपरिणामअनुसार यसअघि जित्दै आएका ठूला दललाई पराजित गर्दै तीन नयाँ पार्टीले प्रदेश सभामा प्रतिनिधित्व गरेका हुन् ।
जनमत पार्टी, नागरिक उन्मुक्ति पार्टी, हाम्रो नेपाली पार्टी पहिलोपटक प्रदेश सभामा प्रतिनिधत्व गरेका हुन् । मधेस प्रदेशबाट सिके राउत नेतृत्वको जनमत पार्टीले दुई सिट जित्दै पहिलोपटक प्रतिनिधित्व गरेको हो भने रेशमलाल चौधरी आवद्ध नागरिक उन्मुक्ति पार्टीले सुदूरपश्चिम प्रदेशबाट पाँच सिटमा विजय हासिल गर्दै पहिलोपटक प्रतिनिधित्व गरेको हो ।
अघिल्लो निर्वाचनमा विवेकशील साझा पार्टीबाट प्रदेशसभामा प्रतिनिधित्व गरेको थियो । तर सो पार्टीले यसपटक कतै जित हासिल गर्न सकेन । यसपटक बाग्मती प्रदेश सभामा हाम्रो नेपाली पार्टीले पहिलोपटक प्रतिनिधित्व गरेको छ ।
रवि लामिछाने नेतृत्वको राष्ट्रिय स्वतन्त्र पार्टीले प्रतिनिधिसभामा सात स्थानमा विजयी हासिल गरे पनि प्रदेश सभामा भने शून्य छ । सो पार्टीले प्रदेश सभामा भागै लिएन । लामिछानेले प्रदेशतर्फको मतपत्रमा संकेत चिन्हसमेत लगाएनन् ।
मंसिर ४ गते सम्पन्न भएको प्रतिनिधि सभा र प्रदेसभाको निर्वाचनमार्फत प्रत्यक्ष र समानुपातिक सासंदहरू चुनिनेछन् । प्रत्यक्षतर्फ ९५ प्रतिशत नतिजा सार्वजनिक हुँदा समानुपातिक मतगणना जारी छ ।
प्रतिनिधि सभामा प्रत्यक्षतर्फ १६५ सिट र समानुपातिक तर्फ ११० सिट गरी कूल २७५ सासंद हुँदा प्रदेशसभामा प्रत्यक्षतर्फ ३३० र समानुपातिकतर्फ २२० सासंद निर्वाचित हुनेछन् । समानुपातिकमा सासंद पाउनको लागि कुनै एक दलले प्रतिनिधिसभामा कूल सदर मतको ३ प्रतिशत थ्रेसहोल्ड कटाउनुपर्छ भने प्रदेशतर्फ १.५ प्रतिशतको थ्रेसहोल्ड कटाउनुपर्ने संवैधानिक व्यवस्था छ ।