देशका विभिन्न जिल्लामा भएका सवारी दुर्घटनामा परेर आठ जनाको ज्यान गएको छ । ताप्लेजुङ, रौतहट, कञ्चनपुर, सर्लाही र सुनसरीमा भएका सवारी दुर्घटनामा एक पैदलयात्री सहित आठ जनाको निधन भएको प्रहरीले जनाएको छ ।
ताप्लेजुङको मैवाखोला गाउँपालिका-४ चाप्लिङ खोल्सामा प्रदेश नम्बर २-०३-००१ त ५६५५ नम्बरको ट्याक्टर सडकबाट करिब २ सय ५० मिटर तल खसेर गएराति दुर्घटना हुँदा ट्याक्टरमा सवार मैवाखोला गाउँपालिका-५ काम्साङ बस्ने ३१ वर्षीय पासाङ शेर्पा समेत ४ जनाको घटनास्थलमै मृत्यु भएको छ ।
रौतहटको फतुवाविजयपुर नगरपालिका-११ हिमालिवासस्थित सडकमा ना.३ ख २४४९ नम्बरको बसको ठक्करबाट पैदलयात्री सोही ठाउँ बस्ने ७३ वर्षीया गौरी मैनालीको मंगलबार दिउँसो मृत्यु भएको छ । ठक्करबाट गम्भीर घाइते भएकी उनको नेशनल मेडिकल वीरगंजमा उपचारको क्रममा मृत्यु भएको हो । बस चालकलाई प्रहरीले नियन्त्रणमा लिएको छ ।
कञ्चनपुरको बेलौरी नगरपालिका-५ मैनाहास्थित जंगलमा सु.प.प्र.०१-०११ प २४३२ नम्बरको मोटरसाइकल गाडामा ठोक्किर मंगलबार साँझ दुर्घटना हुँदा मोटरसाइकल चालक लालझाडी गाउँपालिका-३ बल्मी बस्ने ३० वर्षीय रमेश रानाको मृत्यु भएको छ । दुर्घटनामा गम्भीर घाइते भएका उनको ईशान मेमोरियल अस्पताल बेलौरीमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार अर्का एकजनाको मायामेट्रो अस्पतालमा उपचार भइरहेको छ ।
सर्लाहीको बरहथवा नगरपालिका-४ समनपुर पुलमा ना.५६ प ८९०४ नम्बरको मोटरसाइकल आफै अनियन्त्रित भई मंगलबार बेलुकी दुर्घटना हुँदा मोटरसाइकल चालक सोही नगरपालिका-४ बस्ने २९ वर्षीय भाग नारायण यादवको मृत्यु भएको छ । दुर्घटनामा गम्भीर घाइते भएका उनको न्यूरो अस्पताल बारामा उपचारको क्रममा मृत्यु भएको हो ।
सुनसरी, रामधुनी नगरपालिका-५ स्थित सडकमा को.३६ प ५५५५ नम्बरको मोटरसाइकल आफै अनियन्त्रित भई मंगलबार राति दुर्घटना हुँदा मोटरसाइकल चालक सोही नगरपालिका-५ बस्ने ४० वर्षीय अनिल चौधरीको मृत्यु भएको छ । दुर्घटनामा गम्भीर घाइते भएका उनको उपचारको लागि अस्पतालतर्फ लैजाने क्रममा बाटोमै मृत्यु भएको हो ।