उच्च अदालत तुलसीपुरले देव विकास बैंक नारायणपुरका शाखा प्रबन्धक समिर बुढाथोकीलाई २१ करोड ५३ लाख ३३ हजार ४०१ रुपैयाँ जरिवाना र ७ वर्ष कैद सजायको फैसला गरेको छ ।
बुढाथोकीले २०७४ चैत ३० देखि २०७६ जेठ १२ गतेसम्म १५ महिनाको अवधिमा ३६ वटा नक्कली कर्जा खाता सिर्जना गरी बैंकको १८ करोड ३ लाख ७२ हजार २१८ रुपैयाँ ५३ पैसा हिनामिना गरेको ठहरसहित अदालतले उक्त सजाय तोकेको हो ।
बुढाथोकीलाई बिगो ३ करोड ५० लाख ६० हजार ५८२ रुपैयाँ ५३ पैसा र जरिवाना १८ करोड ३ लाख ७२ हजार २२१ रुपैयाँ ५३ पैसासहित २१ करोड ५३ लाख ३३ हजार ४ सय १ रुपैयाँ र ७ वर्ष कैदको सजाय हुने अदालतले ठहर गरेको छ ।
यस्तै बुढाथोकीले ३६ वटा कर्जा खातामा १७ करोड ९९ लाख ९० कर्जा रकम सिर्जना गरी आफू, स्थानीय बसन्त बस्नेतसहित ४५ जनाको बैंक खातामा रकमान्तर गरी हिनामिना गरेको आरोपमा मुद्दा दायर भएको थियो ।
बैंकका शाखा प्रबन्धक बुढाथोकीसहित ५६ जना बिरुद्ध उजुरी परेको थियो । जसमध्ये अदालतले ३३ जनालाई कैद र जरिवाना तथा अन्य ३ जनालाई बिगो जरिवाना तोकेको उच्च अदालत तुलसीपुरले जानकारी दिएको छ ।
समिर बुढाथोकी साविक वेष्टर्न डेभलपमेन्ट बैंक लिमिटेडको कनिष्ठ अधिकृत भई नारायणपुर शाखामा शाखा प्रबन्धक भएपछि २०७४ फागुनदेखि १५ महिनासम्म कर्जा खाताको भौतिक फाइल नबनाई बैंकिङ सफ्टवेयर प्रणालीको दुरूपयोग गरी ३६ वटा नक्कली कर्जा खाता खोलेर १७ करोड ९९ लाख ९० हजार रुपैयाँ बराबर रकम हिनामिना गरेको देखिएन आएको फैसलामा उल्लेख छ।
