भारतीय रक्षा मन्त्री राजनाथ सिंहले भियतनामको तीन दिने भ्रमण गरेका छन्। भियतनाम भ्रमणका क्रममा रक्षामन्त्री सिंहले भियतनामका समकक्षी जनरल फान भान जियाङसँग द्विपक्षीय रक्षा सहयोगका विषयमा गम्भीर छलफल गरेका हुन्।
सिंहले हाई फोङको हङ हा यार्डमा भियतनामलाई १२ वटा हाई-स्पीड डुंगा हस्तान्तरण समारोहको पनि अध्यक्षता गरेका थिए। दक्षिण-पूर्वी एसियाली देशलाई भारतको १० करोड डलरको रक्षा रेखा अन्तर्गत एल एण्ड टीद्वारा निर्मित डुङ्गाहरू हस्तान्तरण गरिएको भारतीय रक्षा मन्त्रालयले जनाएको छ।
‘यो परियोजना भियतनामसँग बढ्दो रक्षा उद्योग सहयोगको सन्दर्भमा महत्त्वपूर्ण छ र प्रधानमन्त्री नरेन्द्र मोदीको ‘आत्मनिर्भर भारत’ र ‘मेक इन इन्डिया, मेक फर द वर्ल्ड’ को दर्शनको उदाहरण हो,’ विज्ञप्तिमा भनिएको छ। सिंहले हनोईस्थित स्वर्गीय राष्ट्रपति हो चि मिन्हको समाधिस्थलमा श्रद्धाञ्जली अर्पण गरेर भ्रमणको सुरुवात गरेका हुन्।
सिंहले जनरल जियाङसँग द्विपक्षीय वार्ता गरेर नेताहरूले द्विपक्षीय रक्षा सहयोगको समीक्षा र सैन्य संलग्नतालाई थप सुदृढ बनाउने नयाँ पहलको विषयमा छलफल भएको बताइएको छ। वार्ताले साझा चासोका क्षेत्रीय र विश्वव्यापी मुद्दाहरू समेटेको पनि बताइएको छ।
सिंहले आफ्नो भ्रमणका क्रममा राष्ट्रपति गुएन सुआन फुक र प्रधानमन्त्री फाम मिन चिनसँग पनि भेट गरेका छन्। रक्षा मन्त्रीको यात्रा कार्यक्रममा भियतनामका न्हा ट्राङमा रहेको टेलिकम्युनिकेशन युनिभर्सिटीलगायतका प्रशिक्षण संस्थाहरूको भ्रमण समावेश छ। जहाँ भारतबाट ५० मिलियन डलरको अनुदानमा आर्मी सफ्टवेयर पार्क स्थापना भइरहेको मन्त्रालयले जनाएको छ।
भारत र भियतनामबीच द्विपक्षीय कूटनीतिक सम्बन्ध स्थापना भएको ५० वर्ष पूरा भएको समयमा यो भ्रमण भएको हो। सन् २०१६ देखि दुई देशबीच व्यापक रणनीतिक साझेदारी रहेको र रक्षा सहयोग सम्बन्धको प्रमुख स्तम्भ पनि रहेको बताइएको छ।