नेपाल आयल निगमले डिजल, पेट्रोल र मट्टितेलको मूल्य घटाएको छ ।
बिहीबार बसेको निगम सञ्चालक समितिको बैठकले डिजल, पेट्रोल र मट्टितेलको मूल्य लिटरमा १०-१० रुपैयाँले घटाउने निर्णय गरेको निगमका सह-प्रवक्ता पुस्कार कार्कीले जानकारी दिए ।
अब पेट्रोलको मूल्य प्रतिलिटर १७० रुपैयाँ र डिजल तथा मट्टीतेलको मूल्य १५३ रुपैयाँ पर्नेछ । यो मूल्य आज मध्यरातबाट लागू हुने कार्कीले बताए ।
अर्थ मन्त्रालयले पूर्वाधार कर घटाएर मूल्य समायोजन गर्न लिखित निर्देशन दिएपछि यस्तो निर्णय आएको हो ।
डा. युवराज खतिवडा अर्थमन्त्री भएका बेला प्रतिलिटर इन्धनमा पूर्वाधार कर समेत जोडेर लिन सुरु भएको थियो । त्यसलाई हटाउन माग हुँदै आए पनि सरकारले बेवास्ता गर्दै आएको थियो । खाना पकाउने ग्याँस र हवाई इन्धनको मूल्य भने घटेको छैन।
नयाँ मूल्यपछि निगमलाई पेट्रोलमा प्रतिलिटर ३१.४१ रुपैया, डिजेलमा प्रतिलिटर २८.३३ रुपैयाँ घाटा रहेको छ भने मट्टितेलमा भने प्रतिलिटर ५.४४ रुपैयाँ नाफा रहेको निगमले जनाएको छ ।
