विराटनगर महानगरपालिकाको प्रमुख पदमा सत्ता गठबन्धनतर्फबाट नेपाली कांग्रेसका नागेश कोइरालाले अग्रता कायमै राखेका छन् ।
सो महानगरको निर्वाचन अधिकृतको कार्यालयबाट दिउँसो १:४० बजे घोषित मतपरिणाम अनुसार कोइरालाले पाँच हजार मत कटाएका छन् ।
१६ हजार ३४३ मत गणना हुँदा कोइराला ५१८३ मतका साथ अग्रस्थानमा छन् । नेकपा एमालेका सागर कुमार थापाले ३६६७ मत पाएका छन् । स्वतन्त्र उम्मेदार उमेश कुमार यादवको लालटिन चुनाव चिह्नले १७३२ मत पाउँदा राप्रपाका प्रहाद शाहले ८३२ मत पाएका छन् ।
त्यस्तै सो महानगरको उपप्रमुख पदमा एमालेकी शिल्पा कार्की र गठबन्धनको तर्फबाट जसपाका अमरेन्द्र यादवबीच मतान्तर घट्दै गएको छ । कार्कीले ४१८२ मत पाएकी छन् भने यादवले ३०८३ मत ल्याएका छन् । सुरुवात मतगणनामा निकै पछि रहेका जसपा अध्यक्ष उपेन्द्र यादवका छोरा अमरेन्द्रले पछिल्लो समय मतान्तर घटाउँदै लगेका हुन् । यादव कार्कीभन्दा १०९९ मतले पछि छन् ।
राप्रपाकी विन्दा आचार्य १०३६ मतका साथ तेस्रो स्थानमा रहँदा स्वतन्त्र उम्मेदवार नमिता न्यौपानेको लालटिन चुनाव चिह्नले ९२२ मत पाएको छ । न्यौपाने माओवादी केन्द्र विराटनगर नगर कमिटी सचिव हुन् ।
