मोरङको कानेपोखरी गाउँपालिकामा नेपाली काङ्ग्रेस र नेकपा (एमाले) का कार्यकर्ताबीच झडप भएको छ । बुधबार राति साढे १० बजे कानेपोखरी–२ दलेली बजारनजिकै दुई पक्षबीच झडप भएको प्रहरीले जनाएको छ ।
झडपमा परेर एमाले भातृ सङ्गठन राष्ट्रिय युवा सङ्घ मोरङका अध्यक्ष नवीन पौडेल घाइते भएका छन् । टाउकोमा चोट लागेका उनी उपचारपछि घरमै आराम गरिरहेका छन् । पौडेल कानेपोखरी–६ का बासिन्दा हुन् ।
मध्यरातमा मतदातालाई प्रभावित पार्नका लागि दलेली बजारनजिकको विपन्न बस्ती पुगेका दुवै समूहबीच जम्काभेट भएको थियो । दुई समूहबीच जम्काभेट भएपछि झडप भएको हो । इलाका प्रहरी कार्यालय पथरीबाट पुगेको प्रहरी टोलीले घटना स्थलबाट एउटा मोटरसाइकल नियन्त्रणमा लिएको छ ।
मोरङ प्रहरी प्रमुख एसपी शान्तिराज कोइरालाले दुवै समूहले निर्वाचन आचारसंहिता र मौन अवधिको उल्लङ्घटन गरेको प्रारम्भिक अनुसन्धानबाट खुलेको बताए । घटनाका बारेमा विभिन्न कोणबाट अनुसन्धान थालिएको उनको भनाइ छ । एसपी कोइरालाले घटनामा संलग्नको खोजी तीव्र पारिएको जानकारी दिए ।
