प्रदेश १ का आन्तरिक मामिला तथा कानूनमन्त्री केदार कार्कीले हिंसा भड्काउने जो कोहीलाई कानुनी दायरामा ल्याइने बताएका छन् ।
मोरङको लेटाङमा आइतबार भएको झडपमा परी उपचाररत घाइतेहरूको स्वास्थ्य अवस्थाबारे जानकारी लिएपछि मन्त्री कार्कीले यस्तो बताएका हुन् ।
मन्त्री कार्कीले मङ्गलबार कोसी अस्पताल र नोबेल अस्पतालमा पुगेर घटनामा घाइते भएकाहरूको स्वास्थ्य अवस्थाबारे जानकारी लिएका थिए ।
बिरामीको स्वास्थ्य अवस्थाबारे जानकारी लिएपछि मन्त्री कार्कीले घाइतेको उपचारमा सम्बन्धमा विशेष ख्याल गर्न अस्पताल प्रशासनलाई आग्रह गरे ।
यस्तै, मन्त्री कार्कीले प्रहरी जवानको परिवारलाई न्यायदिने बताए ।
आइतबार स्थानीय विद्यालयका शिक्षकले विद्यार्थीमाथि यौन दुर्व्यवहार गरेको विरोधमा भएको झडपमा प्रहरी जवान उर्मिला श्रेष्ठको मृत्यु भएको थियो ।
मन्त्री कार्कीले समाजलाई आक्रोशित र आतङ्कित बनाउने तत्त्वहरूले सरकारलाई गम्भीर बनाएको बताउँदै भने, ‘हिंसा भड्काउने, हिंसा बढाउने, हिंसा बढाउन उकास्ने जो कोही पनि कानुनी दायरामा आउँछन् । अनुसन्धानको क्रम जारी छ सफल अनुसन्धान हामी गर्छौं ।’