अमेरिकी सहयोग परियोजना (एमसीसी) लाई लिएर विरोधमा उत्रिएका प्रदर्शनकारी र प्रहरीबिच काठमाडौँको नयाँ बानेश्वर क्षेत्रमा झडप भएको छ ।
प्रदर्शनमा उत्रिएका वाइसिएल र अखिल क्रान्तिकारीबिच नयाँ बानेश्वरको एभरेष्ट होटेल अगाडी झडपमा भएको हो । संसद् कार्यालय घेर्ने भनेर अगाडि बढिरहेका प्रदर्शनकारीलाई प्रहरीले निषेधित क्षेत्र भन्दै रोक्न खोजेपछि धकेलाधकेली समेत भएको थियो ।
केही प्रदर्शनकारीहरूले ढुंगाले प्रहरीमाथि प्रहार समेत गरेका थिए । यसरी हानिएको ढुंगाले तस्बिर खिचिरहेका फोटो पत्रकार सरोज बस्नेतलाई समेत लाग्न पुगेको छ ।
प्रहरीले पानीको फोहोरा प्रयोग गरेर प्रदर्शनकारीलाई तितरबितर पार्ने प्रयास गरेको छ । पानीको फोहोराले गर्दा कति प्रदर्शनकारीहरू बाटोमै ढल्न पुगेका थिए ।
बालुवाटारमा प्रचण्ड र प्रधानमन्त्री शेर बहादुर देउवाको भेटघाटपछि आज संसद्मा एमसीसी टेबल नहुने भएको छ । आज बैठक बसेर सभामुखले अर्को बैठक फाल्गुन ६ गते बस्ने गरी आजको बैठक समापन भएको घोषणा गरेका छन् ।
