दुईपांग्रे सवारी साधन सफा गर्नु कतिपय मानिसलाई सामान्य कुरा लाग्न सक्छ तर सही तरिकाले सफा नगरिएमा बिस्तारै सवारी साधनको रङ र चमक हराउन पनि बेर लाग्दैन । चारपांग्रेको तुलनामा दुईपांग्रे सवारी साधनमा बढी कुनाकाप्चा हुने र केबुल, इन्जिन, गियरबक्स बाहिरै देखिने हुनाले सोलाई सफा गर्दा निकै ध्यान पुर्याउनु पर्ने हुन्छ ।
केही कुराको ख्याल राखेर आफ्नो बाइकलाई छिट्टै बिग्रनबाट बचाउन सकिन्छ । त्यसैले बाइक सफा गर्ने तरिका बारे जानकारी राख्नु आवश्यक हुन्छ ।
– बाइक धुँदा बाइकको एक्जस्ट पाइप अर्थात् साइलेन्सरलाई पानीबाट बचाउनुपर्छ, साइलेन्सरमा पानी परेमा बाइक स्टार्ट गर्न निकै गाह्रो हुन्छ । जसले गर्दा बाइकलाई पटक–पटक किक हानेर स्टार्ट गर्नु पर्ने हुन्छ ।
– बाइकलाई नरम कपडाले मात्र सफा गर्नुहोस् । यदि बाइकलाई नरम नभएको अन्य कुनै चीजले सफा गर्नुभयो भने, बाइकमा दाग लाग्न सक्छ । साथै, बाइकको रङ पनि विस्तारै बिग्रदै जान्छ । फलस्वरूप, बाइकले आफ्नो चमक गुमाउँछ र बाइक पहिलेको तुलनामा अलि पुरानो देखिन्छ ।
– बाइक धुनको लागि सधैं बाइक स्याम्पु प्रयोग गर्नुहोस् । यसले बाइकको चमक कहिल्यै बिगार्दैन ।
– बाइक धुँदा बाइकको कि–लकमा पानी नपार्ने प्रयास गर्नुहोस् । यदि बाइकको कि–लकमा पानी पर्यो भने, यसलाई खोल्न र बन्द गर्न समस्या हुनेछ ।
– बाइकलाई राम्ररी धोई सकेपछि सफा कपडाले पुछ्नु पर्छ । नपुछेमा पानीको दाग बस्न सक्छ । पुछ्ने काम माथि बडीबाट सुरु गर्नु पर्छ । अनि मात्र अन्य पार्ट्सलाई पुछ्नु पर्छ ।