मोरङको धनपालथान–४ स्थित कर्सियाको सिटिजन्स बैङ्क लुटपाटमा संलग्न रहेका चार जना जेल चलान भएका छन् । सिटिजन्स बैङ्कबाट २४ लाख ८४ हजार लुटपाट गर्ने मुख्य आरोपीसहित चार जनालाई जिल्ला अदालत मोरङले आइतबार पुर्पक्षका जेल चलान गरेको हो ।
न्यायाधीश सुदर्शन लम्सालको इजलासले बैङ्क लुटपाटमा संलग्न रहेका चार जना अभियुक्तलाई पुर्पक्षको लागि जेल चलान गर्ने आदेश दिएको मोरङ जिल्ला अदालतका स्रेस्तेदार टिकेन्द्र वीरजङ्ग राणाले जानकारी दिए ।
आइतबार भएको थुनछेक बहसपछिको आदेशले विराटनगर–८ का ३२ वर्षीय श्याम मुखिया, भारतको अररियास्थित सेखपुल¬–५ का २८ वर्षीय सुनिल यादव, गोराहा–४ का ३० वर्षीय विजय सहनी र २२ वर्षीय रोशनकुमार यादवलाई पुर्पक्षको लागि जेल चलान गर्न आदेश दिएको हो ।
असोज २५ गते सोमबार अपरान्ह करिब पौने ४ बजेको समयमा धनपालथान–४ स्थित कर्सिया बजारको सिटिजन्स बैङ्कमा लुटपाट भएको थियो । बैङ्कभित्र प्रवेश गरेका ७ जना हतियारधारीको समूहले बैङ्क लुटेका थिए । प्रतिकार गर्न खोज्दा बैङ्कका सुरक्षा गार्डलाई गोली हानेर घाइते बनाएका थिए ।
बैङ्क लुटेर फरार भएका उनीहरूमध्ये तीन जनालाई घटना भएको केही बेरमै स्थानीयको सहयोगमा प्रहरीले पक्राउ गरेको थियो ।
त्यसपछि अनुसन्धान थालेको प्रहरीको विशेष टोलीले लुटपाटमा संलग्न रोशन यादवलाई पेस्तोलसहित पक्राउ गरेको थियो । उनी भारतमा पक्राउ परेका थिए । यादव बैङ्कबाट लुटिएको रकम लिएर सीमावर्ती क्षेत्र हुँदै भारत फरार भएका मुख्य अभियुक्त हुन् ।
त्यसअघि उनीहरूले असोज २२ गते विराटनगरको मेनरोडस्थित कोटेक्स टेडिङ्गको गार्मेन्ट पसल लुटपाट गरेका थिए । घटनामा संलग्न ११ जना भए पनि बैंक लुटपाटमा आठ जना आएर लुटपाट गरेको प्रहरीले जनाएको छ । लुटेराले बैंकदेखि लुटेर लगेको रकम भने फेला परेको छैन ।