नेपाल मुद्रा विप्रेषण सङ्घको १६औँ वार्षिक साधारण सभाले चन्द्र टण्डनको नेतृत्वमा नयाँ कार्यसमिति चयन गरेको छ ।
शुक्रवार राजधानी काठमाडौँमा सम्पन्न भएको साधारण सभाले नयाँ कार्यसमितिमा रितेश मित्तल उपाध्यक्ष, सञ्जय सिग्देल महासचिव, इन्द्र प्रसाद शर्मा कोषाध्यक्ष तथा सचिवमा दिपेन्द्र खनाललाई चयन गरेको हो ।
यसै गरी सदस्यतर्फ प्रविन अधिकारी, दिवाकर पौडेल, सञ्जिव पाठक, चयन भएका छन् ।
सङ्घको बिधानत अध्यक्षबाट मनोनीत हुने २ जना सदस्यहरूमा भने युमा श्रेष्ठ र रामेश्वर सापकोटा मनोनीत भएका छन् ।
सङ्घको कार्य प्रगति प्रतिवेदन प्रस्तुत गर्दै अध्यक्ष सुमन पोखरेलले रेमिट्यान्सको पछिल्लो अवस्था सन्तोषजनक नरहेको बताउँदै औपचारिक माध्यमबाट रेमिट्यान्स भित्राउन सबैले सामूहिक प्रयत्न गर्नुपर्नेमा जोड दिए । आफ्नो कार्यकालमा आफू र आफ्नो कार्यसमितिलाई पूर्णता सहयोग गर्ने सबैप्रति आभार प्रकट गर्दे अध्यक्ष पोखरेलले सहमतिमा सबैको प्रतिनिधित्व हुने गरी नयाँ नेतृत्व चयन गरिएको बताए ।
सङ्घको वार्षिक प्रतिवेदन प्रस्तुत गर्दे सङ्घका महासचिव रितेश मित्तलले कोभिड १९ का कारण नकारात्मक हुने अपेक्षा गरिएको रेमिट्यान्स गत आर्थिक वर्षमा वृद्धि भएको तर यस आर्थिक वर्षमा भने सुरु देखिनै रेमिट्यान्सको आप्रवाहमा आएको गिरावटप्रति चिन्ता व्यक्त गरे । सङ्घका कोषाध्यक्ष सञ्जय सिग्देलले सङ्घको वार्षिक आर्थिक प्रतिवेदन गरेका थिए ।
कार्यक्रमलाई सम्बोधन गर्दे नवनिर्वाचित अध्यक्ष चन्द्र टण्डनले नेपालमा रेमिट्यान्स क्षेत्रलाई संस्थागत गर्दे विस्तारित र मर्यादित उद्योगको रूपमा विकास गर्दे लैजाने र सम्पूर्ण रेमिट्यान्स कम्पनीहरूको संस्थागत हितको लागि काम गर्ने प्रतिबद्धता व्यक्त गरे ।
नव निर्वाचित अध्यक्ष टण्डनले आइएमई र आईएमई ग्रुपका अध्यक्ष चन्द्र प्रसाद ढकालको भूमिकाको स्मरण गर्दे उनको अथक मिहिनेत र प्रयासबाट नै रेमिट्यान्स क्षेत्र यति ठुलो व्यवसायको क्षेत्र बनेको उल्लेख गरे ।
त्यस्तै प्रभू ग्रुपका अध्यक्ष देवी प्रकाश भट्टचन लगायत यस क्षेत्रलाई योगदान पुर्याउने सम्पूर्ण अग्रजहरूको भूमिकालाई विशेष स्मरण गर्दै उनीहरूको योगदानको उच्च कदर गरे । सोही क्रममा उनले रेमिट्यान्स व्यवसायलाई अझ व्यवस्थित र प्रविधिमैत्री बनाउन आफू लागी पर्ने प्रतिबद्धता पनि व्यक्त गरेका छन् ।
नेपाल मुद्रा विप्रेषण सङ्घले सङ्घको १६औँ वार्षिक साधारण सभाको अवसर पारेर हालसम्म यस सङ्घको पदाधिकारीमा रही काम गरेका पूर्व पदाधिकारीहरूलाई पनि सम्मान गरेको थियो ।