नेकपा (एकीकृत समाजवादी) का अध्यक्ष माधवकुमार नेपालले नेकपा एमालेको सम्पत्तीमा आफूहरूले पनि हकदाबी गर्ने बताएका छन् ।
केहीदिनअघि सुनसरीको इटहरीमा आयोजित पार्टी प्रशिक्षण कार्यक्रममा अध्यक्ष नेपालले उक्त कुरा बताएका हुन् ।
नेपालले तत्कालीन एमालेको सबै सम्पत्ति केपी ओली समूहले खोसेको आरोप पनि लगाए।
नेपालले उक्त सम्पत्तिमा आफूहरूको समेत भाग लाग्ने बताउँदै कानूनी प्रक्रिया अनुसार हकदावी गर्ने समेत बताए। ‘जोड्दै जाने हो भने कति अरब पुग्ने हो, भौतिक सम्पत्ति छ, नगद पनि छ। ती सबै खोसेर लगेका छन्। कब्जा गरेको छ,’ नेपालले भने, ‘तर पनि केही भएको छैन। फेरि आर्जन गरौंला। हक लाग्छ भने त्यो पनि हकको लागि कानूनी उपायहरू पनि खोजौँला।’
एमालेको आर्थिक विभागको जिल्ला पार्टी कार्यालयहरूमार्फत देशैभर रहेका पार्टीका चल–अचल सम्पत्ति पुनः अभिलेखीकरण (अपडेट) गर्ने निर्णय गरेको छ । देशभरिको सम्पत्ति विवरण र देशभर पार्टी कार्यालयको खाताको विवरण केन्द्रीकृत भइसकेपछि देश–विदेशमा रहेका जोकोहीले एमालेको सम्पत्ति जान्न पाउने गरी वेबसाइटमा अभिलेखीकरण गर्ने एमालेको तयारी छ ।
देशको धनि पार्टी एमाले
निर्वाचन आयोगमा बुझाएको सम्पत्ति विवरणका आधारमा नेकपा एमाले मुलुककै सबैभन्दा धनी पार्टी हो। एमालेसँग जग्गा, भवन र नगदसहित एक अर्बभन्दा धेरै सम्पत्ति छ। नेपालले पार्टी विभाजन गरेपछि अब एमालेको सम्पत्ति पनि विभाजन हुन्छ कि हुन्न भन्ने प्रश्न खडा भएको छ।
नेपाल पक्षले विभाजनपछि सम्पत्तिमा दाबी गर्ने तयारी गरिरहेको छ। माधव नेपाल पक्षका नेता राजेन्द्र पाण्डेले सम्पत्तिमा आफूहरूको पनि हक रहेको बताए।
‘अहिलेका लागि हाम्रो सम्पत्ति कार्यकर्ता हुन्। घर/सर सम्पत्ति ठूलो होइन’, पाण्डेले सेतोपाटीसँग भने, ‘कार्यकर्ता २१ दिनभित्र पार्टीमा ल्याउने म्याद छ। त्यसपछि सम्पत्ति दाबी गर्न पाइहाल्छौं। त्यसको म्याद जाँदैन।’
नेकपा एमालेको नाममा राजधानीको बल्खुमा १३ रोपनी जग्गा छ। त्यस्तै पुतली सडकमा मनमोहन मजदुर भवन र मजदुर संगठन जिफन्टको कार्यालय रहेको छ। एमालेको ललितपुरमा तुलसीलाल स्मृति प्रतिष्ठान भवन र काठमाडौंको रानीबारीमा पुष्पलाल प्रतिष्ठानको भवन रहेको छ।
भूकम्पपछि एमालेको बल्खुको भवन भत्किएपछि अहिले पार्टी कार्यालय थापाथलीको भाडाको घरमा छ। पार्टीका बैठकहरू तुलसीलाल स्मृति प्रतिष्ठानको भवनमा हुने गरको छ।
