विश्वका झण्डै ४० देशमा देखा परिसकेको ओमिक्रोन भेरियन्ट छिमेकी मुलुक भारतको राजधानी नयाँ दिल्लीमा पनि देखा परेको छ ।
दिल्लीका स्वास्थ्यमन्त्री सत्येन्द्र जैनलाई उदृत गर्दै भारतीय सञ्चारमाध्यम हिन्दुस्तान टाइम्सले जनाएअनुसार तान्जेनियाबाट दिल्ली फर्किएका ३७ वर्षीय व्यक्तिमा कोरोनाको नयाँ सङ्क्रमण देखिएको हो ।
ती व्यक्तिको एलएनजेपी अस्पतालमा भइरहेको बताइएको छ । भारतमा यो ओमिक्रोन भेरियन्टका पाँचौँ ‘केस’ हो । यसअघि बेङ्गलोर (कर्नाटक) मा दुई, मुम्बईमा एक र गुजरातमा ओमिक्रोन भेरियन्टको सङ्क्रमण पुष्टि भएको थियो ।
अहिलेसम्म १७ जनामा कोभिड परीक्षण पोजेटिभ पाइएको र उनीहरूलाई अस्पतालमा भर्ना गरिएको बताइएको छ ।
नयाँ भेरियन्टका कारण बेलायत, युरोपेली सङ्घ, अमेरिका र क्यानडाजस्ता देशले दक्षिण अफ्रिकासहित केही अफ्रिकी देशबाट आउने उडानमा प्रतिबन्ध लगाएका छन् । गएको २६ नोभेम्बरमा विश्व स्वास्थ्य सङ्गठन (डब्ल्यूएचओ) ले यसलाई ‘ओमिक्रोन’ नाम दिँदै यो नयाँ भेरियन्ट ‘चिन्ताको विषय’ भएको जनाएको थियो ।
