विद्युत् प्राधिकरणले ढल निर्माणमा बाधा पुर्याउने पोल नहटाइदिँदा ठेकेदार कम्पनीले सोही पोलमाथि नै ढलान गरी ढल निर्माण गरेको छ । झापाको कनकाई नगरपालिका–३ अमरपथ सडक (झापारोड) मा ठेकेदार कम्पनी कनकाई आशिष जेभीले ढलको बीचमा पाँचवटा पोल राखेर ढलाइ गरेको हो ।
ठेकेदार कम्पनीले पूर्वाधार विकास योजनाबाट पाएको ठेक्काअनुरूप अढाइ वर्षयता ७.८ किलोमिटर सडकको दुवैतर्फको ढल निर्माणको ठेक्का पाएको थियो । चारआली चोकबाट दक्षिण कनकाई–५ को उत्तर सीमानासम्म ४७ करोड लागतमा पाँच वर्षका लागि ठेक्का पाएको कम्पनीले हाल निर्माणको काम जारी राखेको छ । परियोजना सुरु गर्दा नै विद्युत् प्राधिकरण र दुरसञ्चारलाई पोल हटाइदिन अनुरोध गर्दा पनि अटेर गरेको भन्दै ठेकेदार कम्पनीले ढलको बीचमा पर्ने पाँचवटा पोललाई स्थायी रूपमा ढलान गरिदिएको थियो ।
सम्झौता सकिनेबेलासम्म पनि विद्युत् प्राधिकरणले पोल नहटाइदिँदा पोलमाथि नै ढलान गर्नुपरेको ठेकदार कम्पनीका विदूर मैनालीले जानकारी दिएका छन् । ठेकेदार कम्पनीले १५० जनाभन्दा धेरै मजदूरको सहयोगमा ढल निर्माणको काम गरिरहेको जनाउँदै प्राधिकरणलाई आग्रह गर्दासमेत पोल नहटेपछि पोलमाथि नै ढलान गरिएको मैनालीले केटिएम दैनिकलाई जानकारी दिए ।
‘पूर्वाधारसँग सम्झौता हुँदै गर्दा नै पिएसका लागि १५ लाख रुपैयाँ छुट्टिएको थियो’, उनले भने, ‘जसमा पोल सार्नका लागि मात्र १४ लाख रुपैयाँ खर्च भयो । अरू तीन लाख भने ढलमा पर्ने खानेपानीका पाइप फुटाउँदा र जोड्दा लाग्यो । यसैले पनि त्यस क्षेत्रमा पर्ने विद्युतीय पोल हटाउन प्राधिकरण र दुरसञ्चारसँग भनेका थियौँ । तर उहाँहरूले अटेर गर्दा त्यसैमाथि ढलान गरेका हौँ ।’
ढलमै पोल राखेर ढलान हुँदा पानीको निकास नहुने बताउँदै उनले आफूहरू अलि हतारिएको स्वीकारे । कामदारलाई काम गराउनै पर्ने बाध्यता भएका कारण पनि आफूहरू हतारिएको उनको तर्क थियो । ‘हामीले त्यस ठाउँलाई त्यतिकै छोडेको भएपनि हुन्थ्यो’, उनले भने, ‘तर कामदारलाई खाली राख्न मिलेन । सम्झौता अवधि सकिन लागेको छ । यहाँ पाँच वटाजति पोल ढलमै परे । मास्तिरका पोल भने प्राधिकरणले सारिरहेको छ ।’ अब, पूर्वाधारले पोल सार्नका लागि थप रकम नदिएमा पोल नसारिने जनाए । पैसा दिएको खण्डमा भने क्रेन लगाएर पोल निकालिने उनको भनाइ छ ।
कन्काई नगरपालिकामा नयाँ किसिमको विकास : ढलको बीचमा पाँचवटा पोल राखेर ढलाइ !
झापाको कनकाई नगरपालिका–३ अमरपथ सडक (झापारोड) मा ढलको बीचमा पोल राखेर...
शनिवार, मङ्सिर ११ २०७८यता, कनकाई नगरपालिका वडा नम्बर ३ को विन्धवासीनी टोलविकास संस्थाका संयोजक डिल्लु उप्रेती भने माथि सहरतिर पर्ने ठाउँमा प्राधिकरणले पोल सारेपछि राम्रै तबरले ढल निर्माणको काम भएपनि ग्रामीण भेगमा भने अनौँठो विकास गरेको आरोप लगाए । ‘माथितिर प्राधिकरणले पोल सार्दै रहेछ, ढल पनि राम्रो विकास भएको छ’, उनले भने, ‘हामी गाउँलेलाई भने हेपेर यस्तो अनौँठो किसिमको विकास गरियो । ढल पानीको निकास गर्न बनाइने भएपनि हाम्रो गाउँतिर भने ढलको बीचमै पोल राखेर खेलाँची गरियो । तर हामीलाई मान्य छैन ।’
यसैगरी, विद्युत् प्राधिकरण सुरुङ्गाका प्रमुख रञ्जित विष्टले पोल ढलको बीचमा पारिएको बारेमा आफू अनभिज्ञ रहेको सुनाए । शनिबारसम्म आफूहरूले नियमित निरीक्षण गर्दा त्यस्तो अवस्था नभेटिएको उनको दाबी छ । यदि, त्यस्तो भएको खण्डमा क्रेनको सहायताले पोल सार्न आफूहरू तयार रहेको बताउँदै उनले भने, ‘त्यस्तो अवस्था छैन होला ! हिजोसम्म निरीक्षण गरेका थियौँ । भयो भने ठेकेदार कम्पनीको गल्ती हो । उहाँहरूले हतारिनु ठीक होइन ।’