झापाको कनकाई नगरपालिका–३ अमरपथ सडक (झापारोड) मा ढलको बीचमा पोल राखेर ढलाइ गरेको पाइएको छ । विद्युत् प्राधिकरणले निर्माणका क्रममा बेलैमा पोल नहटाइदिँदा ठेकेदार कम्पनीले चारआली चोकबाट तल कनकाई–५ को उत्तर सीमानासम्म ढलमा पोललाई बीचमै पारेर ढलाइ गरेको हो ।
प्राधिकरणले पोल सार्न ढिलाइ गरेको भन्दै ढल निर्माणको जिम्मा पाएको ठेकेदार कम्पनीले ढलको बीचमा पोल राखेर ढलाइ गरेको हो । पानीको निकासका लागि ढल बनाइन्छ । तर नगरपालिकाको समन्वयको अभावका कारण प्राधिकरणको दोष देखाउँदै ठेकेदार कम्पनीले पानीको निकास नहुनेगरी पाँचवटा बिजुलीको पोल बीचमा पारेर ढल बनाएको हो ।
यस विषयमा नगरपालिकालाई जानकारी गराउँदा पनि कार्यान्वयन नभएको कनकाई नगरपालिका वडा नम्बर ३ को विन्धवासीनी टोलविकास संस्थाका संयोजक डिल्लु उप्रेतीले केटिएम दैनिकलाई जानकारी दिए । ‘विद्युतीय पिल्लर ढलमा परेको थियो’, उनले भने, ‘ढल निर्माण गर्ने काम लामो समयसम्म रोकियो । लामो समयसम्म कुर्दा पनि पोल नसारेको हुँदा ठेकेदारले उक्त पोल बीचैमा राखेर ढलाइ गरेको देख्दा मलाई अचम्म लाग्यो । त्यो ढल बनाएको त पानी निकास पठाउनलाई हो । अनि बिजुलीको पोल बीचमा भएपछि पानी कताबाट जान्छ ?’
यसैगरी उनले ठेकेदार रामप्रसाद मैनालीको आदेशमा कामदारहरूले बिजुलीको पोललाई ढलको बीचमा पारेर ढलाइ गरेको जनाए । यस विषयमा वडाध्यक्ष रुद्रप्रसाद चिमरियालाई जानकारी गराउँदा पनि पहल नभएको बताए ।
यता, नगरपालिकाका इन्जिनियर कुशल हुमागाईले ढल निर्माणका लागि पालिकाले दिएको बजेट नभइ केन्द्रीयस्तरबाट आएको भएका कारण यसबारे आफू जानकार नभएको बताए । ढलको बीचमा पोल पार्दा पानी निकास नहुने बताउँदै यो अचम्मलाग्दो विकास भएको उनको भनाइ छ ।