२६/११ मुम्बई आतंकी हमलालाई स्मरण गर्दै राष्ट्रिय एकता अभियानले शुक्रवार काठमाडौस्थित पाकिस्तानी दुतावासअगाडि मैनवती जुलुस निकालेको छ भने राजबिराजमा आतंकवादविरुद्ध छलफल आयोजना गरेको छ। त्यस्तै, अभियान बिहिवार जनकपुरमा मोटरसाइकल र्याली तथा बुधबार बिरगंजमा आंतकवादविरुद्ध छलफल आयोजना गरेको थियो।
जुलुस गर्ने क्रममा अभियान्ताहरुले पाकिस्तानले आतंकवादलाई प्रश्रय दिएको भन्दै बिभिन्न नारा लेखिएको प्लेकार्ड टाँसेका थिए । ‘विश्वशान्तिको दुश्मन–पाकिस्तान, आतंकवादको पहिचान–पाकिस्तान, लादेन कहाँ भेटिए–पाकिस्तानमा, आतंकवादलाई प्रश्रय दिने मुलुक अपराधी हो, आतंकी अखडाहरू नष्ट गर पाकिस्तान, आतंकी परिचालन बन्द गर, मानवअधिकारको उल्लंधन बन्द गर, धार्मिक अतिवादको अन्त्य गर, कट्टरपन्थी मुर्दावाद, विश्व शान्ति कायम गर, संघीय हिन्दु गणतन्त्र नेपाल–जिन्दावादसहितका नारा लेखिएको प्लेकार्ड उनीहरुले बोकेको थिए ।
।
सन २००८ को नोभेम्बर २६ मा मुम्बईमा आतंकवादी हमला भएको थियो । जसमा एक सय ७४ जना व्यक्तिहरु मारिएका थिए र तीनसय बढी जना घाइते भएका थिए । पाकिस्तानबाट जलमार्गबाट डुंगामा आएका १० जना लस्कर ए तोइबा समूहका आतंकवादीले होटल, रेलवे स्टेशन, सिनेमा हल, अस्पताल, रेस्टुरेन्ट र कलेजमा हमला गरेका थिए । घट्नामा सामेल ९ जना आतंकवादी मारिएका थिए । र, समातिएका एक जनालाई फाँसी दिइएको थियो ।
कार्यक्रममा राष्ट्रिय एकता अभियानका केन्द्रि उपाध्यक्ष सुनिता सहाले कार्यपत्र प्रस्तुत गर्दै नेपालको राष्ट्रिय सुरक्षा र २६/११ मुम्बई हमलाको विषयमा प्रकाश पारेका थिए । नेपालमा कुनै पनि देशको नागरिक सहजै आउन सक्ने, भारतसँगको खुला सिमाना र कमजोर सुरक्षा व्यवस्थाका कारण बेलाबेलामा हुने अबैध घुसपैठ जस्ता विषयलाई चुनौतिको रुपमा रहको उनले बताईन् ।
नेपालमा कुनै पनि देशको नागरिक सहजै आउन सक्ने, खुला सिमाना र कमजोर सुरक्षा व्यवस्थाका कारण बेला बेलामा देखिएको घुसपैठ हुने गरेको, पाकिस्तानले नेपाली भूमि, नाका मार्फत भारत विरोधी कार्य गर्न नेपालका विभिन्न धार्मिक तथा आपराधिक संगठन प्रयोग गरिरहेको, आतंकवादलाई अन्तराष्ट्रिय सञ्जालमा मलजल पुर्याउने हुण्डी कारोबार, हतियार ओसार पसार, भारतीय जालीनोटको कारोबार, सुन तस्करी, लागुपर्दाथ जस्तै अफिम, चरेश, स्मैकको ओसार पसार एवं मानव तस्करी लगायतको अवैध कारोबार बढेको, म्यानमारको रोहिंग्या, बङ्गलादेश, अफगानिस्तान, लगायतका आतंकवाद प्रभावित मुलुकबाट अनाधिकृत रूपमा शरणार्थी वा अन्य आवरणमा नेपालमा प्रवेश गरेको उल्लेख छ ।
त्यस्तै धार्मिक अतिवाद वढावाका लागि अप्रत्यासित रुपमा बढिरहेका वैदेशिक लगानीमा सञ्चालित सामाजिक संस्थाहरु बढेको, फेसबुक, ट्वीटर जस्ता सामाजिक सञ्जालबाट नेपाली युवालाई दिग्भ्रमित गर्ने काम योजनागत रुपमा सञ्चालन भइरहेको, लभ जेहाद र नवीनतम प्रविधि, साइबर अपराध, विश्वव्यापीकरण आदि विषयहरू समेत आउँदो दशकमा नेपालका लागि प्रमुख सुरक्षा चुनौती बनेको कार्यपत्रमा उल्लेख छ ।