मास्टरसेफ सन्तोष साहले बुधबार दिउँसो ३ बजेर ११ मिनेट जाँदा लन्डनको इल्थामबाट एउटा ट्वीट गरे, ‘अहिलेसम्म इन्डियन सेफ भएर बाँचेँ। अब नेपाली सेफ हुँ भनी गर्व गरेर मर्न पाऊँ– अन्तर्राष्ट्रिय सेफ दिवसको शुभकामना!’

सिराहा, कर्जन्हाका सन्तोष साह बिबिसी मास्टरसेफ च्यालेन्जका उपविजेता हुन्। उनले उक्त प्रतियोगिता क्रममा काठमाडौंको यःमरि पकाएर बेलायतलाई चखाए, निर्णायकहरूको वाहवाही पाए र आफू फाइनलसम्म पुगे। त्यसको भिडिओ हेरेदेखि यहाँका स्थानीयमाझ सन्तोषको लोकप्रियता हलक्कै बढेको छ।

उनले बुधबार गरेको ट्वीटले बिहीबार बेलुकी ६ बजेसम्म २४ सय लाइक्स र ११४ रिट्वीट पाएको छ। उक्त ट्वीटलाई सन्तोषले आफ्नो टाइमलाइनमा सबभन्दा माथि टाँचा लगाएर राखेका छन्। ट्वीटमा प्रतिक्रिया दिँदै धेरैले उनको इच्छा पूरा होस् भन्दै शुभकामना दिएका छन्।