अपहरणमा परेका १३ वर्षीय बालकको १० घण्टामा सकुशल उद्धार गर्न सुनसरी प्रहरी सफल भएको छ । बिहीबार दिउँसो करिब ३ बजे सुनसरीको कोसी गाउँपालिका-७ नेपाल भारत सीमा नजिकैबाट १३ वर्षीय बालक दिपेन सदा अपहरणमा परेका थिए ।
अपहरणमा परेका बालकलाई भारतको सुपौल जिल्ला बलबदैपुर-६ बैरयाकमालबाट भारतीय प्रहरीसमेतको सहयोगमा जिल्ला प्रहरी कार्यालय सुनसरीबाट खटिएको प्रहरी टोलीले बिहीबार राति १ः५० बजेको समयमा उद्धार गरी नेपाल ल्याएको हो ।
जिल्ला प्रहरी कार्यालय सुनसरीका अनुसार भारतको सुपौल जिल्ला, ग्राम पञ्चायत बलबदैपुर-६ बैरयाकमाल बस्ने मकुम मियाँ समेतको संलग्नतामा बालक सदाको अपहरण भएको हाे ।
मकुम मियाँ नेपालबाट भारततर्फ नेपाली ज्याला मजदुरी गर्ने कामदारहरू लैजाने ठेकेदार रहेको सुनसरी प्रहरी प्रवक्ता डिएसपी नरेन्द्रकुमार कार्कीले जानकारी दिए । उनका अनुसार मकुम मियाँलाई नेपाली कामदारहरू १५/२० जनाको सङ्ख्यामा उपलब्ध गराइदिन्छु भनी नेपालतर्फ सुनसरी जिल्ला कोसी गाउँपालिका–७ बस्ने भुल्टन सदा लगायत ५ जनाले अग्रिम दुई लाख पैसा भुक्तानी लिएका थिए ।
भुक्तानी लिएर कामदार नपठाएको र मकुम मियाँको सम्पर्कमा समेत नगएकाले मकुम मियाँलगायतको समूहले भुल्टन सदाको गाउँकै बालक दिपेन सदालाई अपहरण गरी लगिएको भन्ने प्रारम्भिक अनुसन्धानको क्रममा खुल्न आएको डिएसपी कार्कीले जनाए ।
अपहरणको क्रममा मकुम मियाँसमेतको समूह दुई वटा मोटरसाइकल ल्याएर बालकलाई मोटरसाइकलको बिचमा राखी नेपालबाट भारततर्फ अन्दाजी ३५ किलोमिटर पूर्व दक्षिण मकुम मियाँकै घरमा लगी राखेको अवस्थामा फेला पारी उद्धार गरिएको प्रहरीले जनाएको छ । अपहरणपश्चात् बालकलाई कुटपिटसमेत गरेको पीडित बालकले बताएका छन् ।
प्रहरीले अपहरणमुक्त भएका बालकलाई उनको अभिभावक आमा र बुवा गणेशजी सदाको जिम्मा लगाएको छ । यो घटनालाई अपहरण तथा शरीर बन्धक शीर्षकअन्तर्गत आवश्यक थप अनुसन्धान भइरहेको डिएसपी कार्कीले जानकारी दिए ।
