दक्षिण भारतीय फिल्म उद्योगका सुपरस्टार जोडी नागा चैतन्य र सामन्था रुथ प्रभुको सम्बन्धविच्छेद भएको छ । शनिबार एक प्रेस विज्ञप्ति जारी गर्दै सामन्थाले आफूहरू अलग हुने निर्णय गरेको जानकारी दिएकी हुन् ।
‘धेरै लामो समयको सोचविचार पछि म र नागा चैतन्यले फरक–फरक बाटोमा अगाडि बढ्ने र पती–पत्नीको रूपमा अलग हुने फैसला गरेका छौं,’ विज्ञप्तिमा भनिएको छ, ‘एक दशकभन्दा लामो समयदेखिको मित्रता नै हाम्रो सम्बन्धको मुख्य हिस्सा थियो र आगामी दिनमा पनि हामीबीच विशेष बन्धन रहनेछ ।’
सामन्थाले मिडियासँग यस विषयमा प्राइभेसी दिन पनि मिडिया र शुभचिन्तकलाई आग्रह गरेकी छन् । सम्बन्धविच्छेदपछि उनलाई नागाको तर्फबाट ५० करोड मिल्नेछ ।
‘यो दम्पतीको सम्बन्ध बचाउन दुवैतिरको परिवारले धेरै प्रयास गरे, तर सबै असफल भयो,’ तेलुगू फिल्म क्षेत्रका स्रोतले भनेका छन्, ‘सामन्थासँगै बसेको घर छोडेर नागा आफ्नो बुबाआमासँग बस्न गएका छन्।’ ‘द फ्यामली म्यान’ले पाएको सफलतासँगै सामन्थाको अभिनयलाई लिएर धेरै प्रशंसा भएको थियो।
बलिउडबाट पाएको मायापछि उनी आफ्नो अभिनय करियर अझै अगाडि बढाउन चाहन्छिन्। यता नागा चैतन्यले पनि आमिर खानको नयाँ फिल्म ‘लाल सिंह चड्डा’बाट बलिउडमा प्रवेश गरेका छन्। योसँगै उनको बालबच्चा जन्माएर परिवार ठूलो बनाउने चाहना छ।
यही फरक चाहनाको कारण सामन्था र नागाबिच मनमुटाव भएको उनीहरुको भित्री स्रोतले जनाएको छ। सामन्था र नागाको पहिलो भेट सन् २००९मा रिलिज भएको फिल्म ‘ये माया चेसावे’को सेटमा भएको थियो। त्योबेलादेखि नै उनीहरुको सम्बन्ध राम्रो थियो र दर्शकहरुले पनि यो जोडीलाई मन पराएका थिए।
सन् २०१७ को अक्टुबर ६ मा यी दुइले गोवामा १० करोड खर्च गरेर बिहे गरेका थिए ।
