काठमाडौंमा यही असोज ४ गतेदेखि कोरोना भाइरसको विरुद्ध भेरोसेल खोपको दोस्रो डोज लगाइने भएको छ ।
असोज ४ गतेदेखि ३ दिनसम्म यो खोप अभियान सञ्चालन हुनेछ । खोप लगाउन जाँदा पहिलो डोज खोप लगाएको कार्ड, विद्युतीय दर्ता गरेको प्रिन्ट वा फोटोसहित नम्बरका आधारमा दोस्रो मात्रा लगाइने स्वास्थ्य कार्यालयका प्रमुख बद्रीबहादुर खड्काले केटिएम दैनिकलाई बताए ।
स्वास्थ्य सेवा विभागले देशभरका जिल्ला स्वास्थ्य कार्यालयहरुलाई भीड नहुने गरि खोप केन्द्रको व्यवस्थापन गर्न निर्देशन दिइसकेको छ । जसअनुसार काठमाडौंमा एक महानगरसहित १० वटा नगरपालिकामा ७ वटा अस्पतालसहित १४५ वटा खोप केन्द्र तोकेको छ ।
काठमाडौं महानगरमा ३२ वडा खोपकेन्द्रबाट खोप लगाइनेछ । त्यसबाहेक नेपाल प्रहरी अस्पताल महाराजगञ्ज, शसस्त्र प्रहरी अस्पताल बलम्बु , वीर अस्पताल, शिक्षण अस्पताल, निजामती कर्मचारी, परोपकार प्रसूति तथा स्त्रीरोग अस्पताल थापाथली र विरेन्द्र सैनिक अस्पताल तोकिएको छ ।
भेरोसेलको पहिलो डोज लगाएको २१ दिन पुरा भएकाहरूले दोस्रो डोजको खोप पाउने छन् ।