सुनसरीको कोसी ब्यारेजबाट नदीमा हामफालेर आत्महत्या गर्न पुगेका ६ जनालाई सुनसरी प्रहरीले उद्धार गरेको छ । असार र साउन महिनामा आत्महत्याको प्रयास गरेका उनीहरूको आत्महत्या प्रयासलाई सुनसरी प्रहरीले असफल बनाइदिएको हो ।
जिल्ला प्रहरी कार्यालय सुनसरीका प्रहरी नायव उपरीक्षक नरेन्द्र कार्कीका अनुसार आत्महत्याको प्रयास गर्नेमा एक वृद्धसमेत रहेका छन् । असार १ गते सुनसरी गढी गाउँपालिका ६ का ७८ वर्षीय यादव थरका वृद्धको उद्धार गरी आफन्तलाई बुझाइएको उनले जनाए ।
त्यस्तै, असार २१ गते मोरङ विराटनगर महानगरपालिका १० का ५५ वर्षीयव अधिकारी थरकी महिला, साउन ४ गते विराटनगर–३ की ३५ वर्षीया सापकोटा भट्टराई थरकी महिला, साउन २० गते भारत मधुवनी जयनगर चित्र गुप्तकोलोनीका २५ वर्षीय ठाकुर थरका युवा, साउन २४ गते सुनसरी इटहरी उपमहानगर–६ का ६५ वर्षीया पोखरेल थरकी महिला र काभ्रेपलान्चोक–१३ का ४० वर्षीया सापकोटा थरकी महिलाले आत्महत्याको प्रयास गरेका थिए ।
आत्महत्याको प्रयास गरिरहेको अवस्थामा प्रहरी चौकी कोसी ब्यारेजको टोलीले नदीबाट उद्धार गरी आफन्तलाई जिम्मा लगाउँदै आएको सुनसरी प्रहरी प्रमुख एसपी सञ्जय सिंह थापाले जानकारी दिए ।