एक जनाकोे मृत्यु र अर्का एक घाइते हुने गरी विराटनगरमा बिहीबार साँझ भएको सवारी दुर्घटनामा कार चालक रोविन कार्की नै भएको प्रहरीले निष्कर्ष निकालेको छ । दुर्घटना हुँदाको समयमा कारमा सवार पाँच जनामध्ये चार जनाले दिएको बयानको आधारमा प्रहरीले यस्तो निष्कर्ष निकालेको हो ।
कारमा सवारको बयानपछि प्रहरी १ नम्बर प्रदेशसभा सदस्य बिन्दिया कार्कीको छोरा रोविन कार्कीको खोजीमा जुटेको स्रोतले जनाएको छ ।
बिहीबार बेलुका रोविनले चलाएको प्रदेश ३–०१–००२ च २१३९ नम्बरको कारको ठक्करबाट भारत कटिहार घर भएका ३५ वर्षीय मुकेश शर्माको मृत्यु भएको थियो । उनी विराटनगर–४ मा रहेको न्यू एभरेस्ट फर्निचरमा काम गर्ने मजदुर हुन् । घटनामा उनकै साथी कटहरी गाउँपालिका–२ का २७ वर्षीय रामकुमार राजवंशी गम्भीर घाइते बनेका थिए । उनको विराटनगरस्थित नोबेल मेडिकल शिक्षण अस्पतालमा उपचार भइरहेको छ ।
सांसदका छोराले चलाएको कार दुर्घटना, एक पैदलयात्रीको मृत्यु, अर्का एक जना घाइते
बिहीबार साँझ साढे ७ बजे विराटनगर–४ एयरपोर्ट मोडमा उनले चलाएको कार अनियन्त्रित भई दुर्घटना भएको थियो । बेलुका ७ः३५ बजे होटल एसियाटिक अगाडि उक्त होन्डा सिटी कारले मजदुरद्वयलाई ठक्कर दिएको थियो । एयरपोर्ट मोडभित्र रहेको एक होटलमा मादक पदार्थ सेवन गरेर कार्की कार लिएर निस्किएको स्रोतले बताएको छ । त्यसबाहेक कारमा बियरका बोतलसमेत रहेको प्रत्यक्षदर्शी बताउँछन् । दुर्घटनामा परेको कार क्षतिग्रस्त भएको छ ।
यस्तो, ज्यानै जानेगरी भएको दुर्घटनामा कार चलाउने सांसदका छोरा रोविनसँग सवारी चालक अनुमतिपत्र (लाइसेन्स) नै नभएको पाइएको छ । यता, उक्त कार प्रदेशसभा सदस्य बिन्दिया कार्कीको भएको पुष्टि भइसकेको छ । कारको ठक्कर दिएपछि अवस्था गम्भीर देखेरे त्यहाँबाट फरार भएका कार्कीलाई प्रहरीले अझै पक्राउ गरेको छैन ।
होटल सञ्चालक र उनीसँगै रहेका चार जनाको बयान
ड्राइभर पक्राउ नपरे पनि प्रहरीले उनीसँगै रहेका चार जनालाई नियन्त्रणमा लिएर बयान लिएको थियो । जिल्ला प्रहरी कार्यालय मोरङका प्रहरी नायव उपरीक्षक मानबहादुर राईका अनुसार उनीसँगै रहेका चार जनालाई अनुसन्धानका लागि झिकाएको थियो ।
सांसदका छोरासँग थिएन लाइसेन्स, पक्राउ गर्न प्रहरीको आनाकानी
उनका अनुसार बयानका क्रममा कारमा सवारहरूले रोविनले चलाएको कार दुर्घटनामा परेको बताएका हुन् । यस्तै, दुर्घटनाअगाडि चियापान गरेको मुनालपथस्थित होटल एडमायरका सञ्चालक पङ्कज शाहलाई समेत नियन्त्रणमा लिएर सोधपुछ गरिएको डिएसपी राईले जानकारी दिए ।
‘हामी अनुसन्धानका क्रममा छौँ’, डिएसपी राईले केटिएम दैनिकसँग भने, ‘कारमा सवार, होटल सञ्चालक तथा प्रत्यक्षदर्शीको समेत बयान लिएका छौँ । आजसम्म बयान सकिएको छ । चाँडै नै दोषीलाई कारवाही गर्छौँ ।’
मृतकको परिवारलाई भारु ५० हजार दिइयो
मजदुरीकै लागि नेपाल आएका मृतकको शव शुक्रबार नै घर पठाइसकिएको छ । प्रहरी स्रोतका अनुसार पीडित पक्षलाई दाहसंस्कार गर्न भन्दै शवसँगै ५० हजार भारतीय रुपैयाँ उपलब्ध गराइएको छ । मृतकको परिवारलाई प्रलोभनमा पार्नका लागि उक्त रकम दिइएको स्रोतको दाबी छ ।
प्रहरीमाथि नै आशङ्का
शुक्रबार घटनाका बारेमा रिपोर्टिङ गर्न गएका पत्रकारहरूलाई प्रहरीले सूचना दिएको थिएन । त्यसबाहेक जिल्ला प्रहरी कार्यालयले पत्रकारहरूलाई समेत यस विषयमा रिपोर्टिङ नगरिदिन आग्रह गरेको थियो ।
यस्तै, प्रहरीले मेडिकल परीक्षण गर्दा प्रमाणित नहोस् भन्नेगरी चालकलाई ढिलो गरी पक्राउ गर्ने योजना अनुरुप छलछाम गरेको स्थानीयको आरोप छ । कार्कीलाई बचाउन प्रदेश सरकारका मन्त्रीदेखि काङ्ग्रेसका माथिल्लो तहका नेताहरूले नै प्रहरीलाई दबाब दिइरहेको स्रोतको दाबी छ ।
कार्कीले यसअघि पनि थुप्रै दुर्घटना गराएको स्रोतको दाबी छ । यद्यपि पहुँचमा भएको कारण उनी छुट्दै आएका थिए । प्रहरीकै संलग्नतामा दोषीलाई उन्मुक्ति दिने प्रयास भइरहेको स्थानीयको आशङ्का छ । कार चालक रबिनसँग सवारी चालक अनुमति पत्रसमेत नभएको खण्डमा रातारात लाइसेन्सधारी सवारी चालक खडा गरि सांसदको छोरा जोगाउन चलखेल सुरु भएको स्रोतको दाबी छ ।