आफ्नै कोठामा सलको पासो लगाएर आत्महत्या गरेकी उदयपुर स्थायी ठेगाना घर भएकी एक महिलाको शव अस्पतालमा अलपत्र अवस्थामा परेकोको छ । पटक–पटक प्रहरीले पत्राचार गर्दा पनि आफन्त सम्पर्कमा नआउँदा आत्महत्या गरेकी उदयपुर जिल्ला कटारी–३ (साबिक) स्थायी ठेगाना भएकी दिलकुमारी तामाङ (राई) को शव बिपी कोइराला स्वास्थ्य विज्ञान प्रतिष्ठानमा अलपत्र परेको हो ।
बस्ने दुर्गाबहादुर राईको छोरी दिलकुमारीको शव गत वैशाख ३१ गते झुण्डिएको अवस्थामा भेटिएको थियो । जिल्ला प्रहरी कार्यालय सुनसरीका प्रहरी नायव उपरीक्षक नरेन्द्र कार्कीका अनुसार इनरुवा–३ स्थित कोठा भाडामा बसेकी दिलकुमारीको शव झुण्डिएको अवस्थामा प्रहरीले फेला पारेको हो ।
घरबेटीले दिएको सूचनाका आधारमा प्रहरीले उनको शव पोस्टमार्टमका लागि बिपी अस्पताल पठाएको थियो । तर उनको आत्महत्या किन भएको भन्नेबारे तथा आफन्तका बारेमा छर–छिमेक वा घरबेटीबाट पनि प्रहरीले जानकारी पाएन । कहीँकतैबाट उनका बारेमा सूचना नपाए पनि प्रहरीले पोस्टमार्टमका लागि धरानस्थित बिपीमा लगेको थियो ।
त्यसैगरी प्रहरीले आफन्तलाई उदयपुर प्रहरीमार्फत पत्राचारसमेत पठाउँदै अनुसन्धानसमेत थालेको थियो । तर अझैसम्म पनि आफन्त सम्पर्कमा नआएको डिएसपी कार्कीले जनाए । उनका अनुसार श्रीमानसँग सम्बन्ध नराम्रो भएपछि केही महिनादेखि दिलकुमारी अलग्गिएर बस्दै आएकी थिइन् ।
‘घटना भएको दस दिन भइसकेको छ तर अझै पनि उनको शव घोपा अस्पतालमै अलपत्र छ’, उनले केटिएम दैनिकसँग भने, ‘कोठामा भेटिएको नागरिकताको आधारमा ठेगानासम्म खुल्यो । सोही ठेगानामा पत्राचार गर्दा पनि परिवारजन अझै सम्पर्कमा आएका छैनन् ।’ उनका अनुसार अझैसम्म पनि उनको शव बिपीको शवगृहमै छ ।
उनको शव कोठामा सलको पासो लगाएर झुण्डिएको अवस्थामा फेला परेको प्रहरीले जनाएको छ । उनलाई कसैले आत्महत्या गर्ने बाध्य बनाएको हुन सक्ने बताउँदै घटनाको थप अनुसन्धान भइरहेको उनले बताए । साथै प्रहरीले उनलाई र अभिभावक वा आफन्तलाई चिन्नुहुनेले उनीहरूलाई जानकारी गराई सहयोग गरिदिन अपीलसमेत गरेको छ ।
शव व्यवस्थापन गर्ने प्रहरीको तयारी
जिल्ला प्रहरी कार्यालय सुनसरीका प्रहरी नायव उपरीक्षक कार्कीका अनुसार अब एक–दुईभित्र आफन्त सम्पर्कमा नआए धरान उपमहानगरको समन्वयमा शव व्यवस्थापन गरिनेछ । ‘हामीले आफन्त खोज्न धेरै प्रयास गरिसक्यौँ । धेरै दिन भइसक्यो । यसैले पनि अब उपमहानगरको शव व्यवस्थापन टोलीसँग समन्वय गरे शव व्यवस्थापन गर्ने तयारी गरेका छौँ । एक–दुई दिनभित्र व्यवस्थापन हुनेछ’, कार्कीले भने ।
