विराटनगरमा निषेधाज्ञाको उल्लङ्घन रोक्नका लागि परिचालित प्रहरी टोलीमाथि स्थानीय व्यापारीले हातपात गरेका छन् । शनिबार साँझ विराटनगर महानगरपालिका–१ पुष्पलाल चोकमा निषेधाज्ञा उल्लङ्घन रोक्न खटिएको डिएसपीसहितको प्रहरी टोलीमाथि आक्रमण भएको हो ।
हिजो साँझ ७ बजे जिल्ला प्रहरी कार्यालय मोरङका प्रहरी नायव उपरीक्षक मानबहादुर राईको टोलीमाथि स्थानीय व्यापारीले बाँसका भाटा प्रहार गर्दैै आक्रमण गरेको मोरङ प्रहरी प्रमुख एसपी सन्तोष खड्काले जानकारी दिए ।
उनका अनुसार साँझका बेला खोलिएको तरकारी पसल बन्द गर्न आग्रह गर्दा तीन महिलासहित चार जनाले प्रहरीको टोलीमाथि आक्रमण गरेको हो । आक्रमणबाट डिएसपी राईसहितका प्रहरीको पाखुरा र शरीरका केही भागमा चोट लागेको भने उनका अङ्गरक्षक प्रहरी जवान रामबहादुर तामाङले लगाएको पोसाक पनि च्यातिएको छ ।
स्थितिलाई नियन्त्रणमा लिन जिल्ला प्रहरी कार्यालय मोरङबाट थप मद्धतका लागि गएको प्रहरी टोलीले आक्रमणमा संलग्नमध्ये पाँच जनालाई पक्राउ गरेको छ । पक्राउ पर्नेमा विराटनगर–१ कि ४० वर्षीया आशा साह, १८ वर्षीया मेनुका साह, २२ वर्षीया अञ्जना साह, १९ वर्षीया उषा साह र अजय साह रहेका छन् ।
डिएसपी राईले आफू सामान्य घाइते भएको जनाउँदै आक्रमण गर्नेलाई सम्झाइ–बुझाइ पठाएको जानकारी दिए ।
