मध्यरातमा प्रधानमन्त्रीको सरकारी निवास बालुवाटारमा बसेको बैठकले प्रतिनिधि सभा विघटन गरेर आगामी कात्तिकको अन्तिम र मंसिरको पहिलो सातामा मध्यावधि चुनावको घोषणा गरेको छ ।
बालुवाटार बैठकमा सहभागी भएका स्वास्थ्यमन्त्री हृदयेश त्रिपाठीले केटिएम दैनिकलाई दिएको जानकारी अनुसार * कात्तिक २६ र मंसिर ३ गते मध्यावधि निर्वाचन गर्नको लागि मन्त्रिपरिषद्ले राष्ट्रपतिसमक्ष सिफारिस गर्ने निर्णय भएको हो ।
राष्ट्रपति विद्यादेवी भण्डारीले नेपालको संविधानको धारा ७६ को उपधारा ५ बमोजिम प्रतिनिधि सभामा विश्वासको मत प्राप्त गर्न सक्ने आधार पेश गरेका प्रधानमन्त्री केपी शर्मा ओली र विपक्षी गठबन्धनबाट नेपाली काँग्रेसका सभापति शेर बहादुर देउवाले दावी गरेअनुसार बहुमत नपुगेको भन्दै विज्ञप्ती जारी गरेपछि संसद् विघटन को सिफारिस गर्न मध्यरातमा बालुबाटारमा मन्त्रिपरिषद् बैठक बसेको थियो ।
संविधानअनुसार उपधारा ५ अनुसार प्रधानमन्त्री नियुक्ति हुन नसकेको अवस्थामा प्रधानमन्त्रीको सिफारिसमा राष्ट्रपतिले प्रतिनिधि सभा विघटन गरी छ महिनाभित्र अर्को प्रतिनिधि सभाको निर्वाचन सम्पन्न हुने गरी निर्वाचनको मिति तोक्नुपर्ने हुन्छ ।
स्वास्थ्य संकटकाल लगाउने तयारी
बालुवाटारमा बसेको क्याबिनेट बैठकले विघटनको निर्णय गरेको हो । यसनिम्ति कानून तथा संघीय मामिलालगायत सबै मन्त्री र केही सचिवलाई आकस्मिक भेला गराइएको छ । सेनापति पूर्णचन्द्र थापा भर्खरै बालुवाटारबाट निस्केको स्रोतको दावी छ ।
वरिष्ठ अधिवक्ता दिनेश त्रिपाठीले अहिलेको घटनालाई “मध्यराती सँविधानमाथि “कू” को सँज्ञा दिएका छन् । बिरोध प्रदर्शनहरु हुन नपाउन् भनेर स्वास्थ्य संकटकाल लगाउने तयारी छ ।
* यसअगाडी अन्यथा भएकाले सच्चाइएको छ
