राष्ट्रपतिले नयाँ सरकारको गठनको लागि आज बेलुका बजेसम्मको समय दिइरहँदा नेपाली काँग्रेसका सभापति शेर बहादुर देउवालाई प्रधानमन्त्री बनाउनको लागि विभिन्न दलका १४९ सासंदको हस्ताक्षर बोकेर शीतलनिवास लैजाने तयारी भएको छ ।
विपक्षी गठबन्धनले नेपाली कांग्रेसका सभापति शेरबहादुर देउवालाई प्रधानमन्त्री बनाउन १४९ सांसदको हस्ताक्षरसहित राष्ट्रपति कार्यालयमा दाबी प्रस्तुत गर्ने तयारी गरेको छ।
शुक्रबार सिहदरबारमा बसेको कांग्रेस, माओवादी केन्द्र, नेकपा एमालेको माधवकुमार नेपाल समूह र जनता समाजवादी पार्टीको उपेन्द्र यादव पक्षका शीर्ष नेताहरुको बैठकमा देउवालाई प्रधानमन्त्रीका रुपमा अघि सार्ने सहमति जुटेको हो । बैठकमा कांग्रेस सभापति शेरबहादुर देउवा, एमाले वरिष्ठ नेता माधवकुमार नेपाल, माओवादी अध्यक्ष दाहाल, जसपा अध्यक्ष उपन्द्र यादव, बाबुराम भट्टराई, नारायणकाजी श्रेष्ठ, शशांक कोइराला, गगन थापा, रामकुमारी झाँक्री लगायत सहभागी थिए।
स्रोतका अनुसार उनीहरूले सांसदको हस्ताक्षर लिइरहेका छन्। १४९ जना सांसदको हस्ताक्षरसहित राष्ट्रपति कार्यालयमा नयाँ सरकारका लागि दाबी पेश गर्न जाने तयारी उनीहरूको छ। कांग्रेसका ६१, माओवादी केन्द्रका ४९, माधवकुमार नेपाल समूहका २७ र जनता समाजवादी पार्टीको उपेन्द्र-बाबुराम समूहका १३ जना छन्।
नयाँ सरकार बनाउन संसदमा कायम २७१ सांसदमध्ये १३६ जना चाहिन्छ। राष्ट्रपति विद्यादेवी भण्डारीले ७६(५) अनुसार प्रधानमन्त्रीमा नियुक्त गर्न संसदको बहुमत प्राप्त गर्ने आधार प्रस्तुत गर्न साँझ ५ बजेसम्मको समय दिएकी छन् । राष्ट्रपतिले दिएको समयसीमाभित्र नयाँ सरकारको गठनको लागि दावी प्रस्तुत भएको खण्डमा प्रधानमन्त्री केपी शर्मा ओलीले राजीनामा दिनुपर्नेहुन्छ ।