कैलाली–कञ्चनपुर जोडने मोहना नदीमा निर्माण भइरहेको मोहना–राजघाट पुल छ वर्ष बितिसक्दा पनि बन्न सकेको छैनन् । मोहना राजघाट पक्की पुलको तीन पटक सम्म म्याद थप भए पनि पुल भन्ने अझै अधुरै छ ।
पुल निर्माणका लागि आर्थिक वर्ष २०७०-०७१ मा चन्द्र शेखर मल्लको निर्माण कम्पनी एलाइट एडभेञ्चर जेभी सँग ठेक्का सम्झौता भएको थियो । तर निर्धारित समयमा पुल सम्पन्न हुँदा स्थानीयबासीलाई समस्या भएको छ ।
‘पुल नबन्दा बिरामी भएको बेला धेरै दुःख हुन्छ’ कृष्णपुर नगरपालिकाका ९ का स्थानीय भागी राम रानाले भने, ‘वर्षाको समयमा खोलामा बाढी आउँछ ज्यानको माया मारेर तर्नुपर्छ ।’ पुलको निर्माण पुरा नहुँदा हिउँदमा भन्दा बर्खामा स्थानीयलाई धेरै समस्या हुने गरेको छ ।
‘गर्भवती महिला, विद्यार्थीहरूलाई बढि समस्या भएको छ’ धनगढी ३ का स्थानीय चक्रबहादुर खड्काले भने, ‘घरको लागी सामान लिनको लागी पनि १० किलोमिटर घुमेर बजार जानुपर्ने बाध्यता छ’ सरकारले बनाउन लागेको पुल निर्माणमा ढिलाइ हुँदा आफूहरूले पैसा तिरेर काठको पुल प्रयोग गर्न बाध्य भएको उनले बताए ।
२०७०-०७१ मा सम्झौता भएर ०७४ असार ३१ सम्म पुल निर्माणको म्याद रहेको थियो । तर दोसो पटक म्याद थप हुँदा ०७६ असोज ३० सम्म पनि निर्माण कम्पनीले भने काम सकेन । तेस्रो पटक म्याद थप ०७८ जेठ २५ सम्म रहेको सडक डिभिजन कार्यालयले केटिएम दैनिकलाई बतायो । निर्माण कम्पनीले समयमै काम सम्पन्न नगरे कारबाही गर्न सडक डिभिजन कार्यालयले जनाएको छ ।
अहिले सम्मको पुल निर्माणको भौतिक प्रगति ८० प्रतिशत मात्रै भएको छ । सडक डिभिजन कार्यालय महेन्द्रनगरका प्रमुख अर्जुनकुमार बमले भने ‘थप गरेको मितिमा पुल पुरा भएन भने हामी कारबाही प्रक्रियामा अघि बढ्छौँ ।’ निर्माण कम्पनी लाई जरिवाना सहित कालो सूचिमा राख्ने उनले बताए ।
निर्माण कम्पनीले भने म्याद थप भित्रै काम सम्पन्न गर्न दाबी गरेको छ । ‘कोरोना, कहरका कारण काममा तीव्रता आउन सकेन’ एलाइट एडभेञ्चर जेभीका इन्जिनियर दिनेश वटालाले केटिएम दैनिकसँग भने ‘थपिएको समयमा हामी काम सम्पन्न गर्छौ ।’