नेकपा केन्द्रिय कार्यालय धुम्बाराहीमा बस्ने भनिएको नेकपा स्थायी कमिटीको बैठक प्रधानमन्त्री निवास बालुवाटारमा बस्ने भएको छ ।
पार्टी कार्यालय धुम्बाराहीमा हुने भनिएको बैठक सुरक्षा कारण देखाउँदै बालुवाटारमा सारिएको हो ।
प्रधानमन्त्री तथा अध्यक्ष केपी शर्मा ओलीको आग्रहमा बैठक बालुवाटारमा सारिएको अर्का अध्यक्ष पुष्पकमल दाहाल र नेता माधवकुमार नेपाल समूहले जनाएको छ ।
बैठक भने दिउँसो १ बजे नै बस्नेछ।
यसअघि २१ मंसिरमा धुम्बाराहीमा बैठक बसेको थियो। उक्त बैठकमा प्रधानमन्त्री तथा पार्टी अध्यक्ष केपी शर्मा ओली सहभागी भएका थिएनन्। आजको बैठकमा उनी सहभागी हुने बताइएको छ।
अध्यक्ष पुष्पकमल दाहालसँग विवाद चुलिएका बेला मंसिर २१ गते दुई पृष्ठ लामो पत्र पठाएर ओली बैठकमा अनुपस्थित भएको थियो । त्यो दिन बैठक केहीबेर मात्रै बसेको थियो ।
एक हप्ताको बिचमा विवाद समाधानको प्रयासस्वरुप अनौपचारिक छलफल भए पनि त्यसले ठोस प्रगति भने गर्न सकेको छैन ।
यसअघि मंसिर २१ गते नेकपा पार्टी कार्यालय धुम्बाराहीमा बसेको स्थायी कमिटी बैठकले ‘पार्टीको आन्तरिक समस्या’लाई एउटै एजेण्डाका रुपमा तय गरेपछि आज दोस्रो बैठक बस्न लागेको हो ।
सहमति जुटाउन आठ दिन समय दिइए पनि नेताहरुबीच पर्याप्त संवाद भएको छैन । स्थायी कमिटीको बैठक लम्बिएका कारण पूर्व निर्धारित केन्द्रीय कमिटीको बैठक आगामी पुस ५ गतेका लागि सारिएको छ ।
आज बिहान नेकपा संसदीय दलका उपनेता तथा स्थायी समिति सदस्य सुवासचन्द्र नेम्वाङ पार्टी अध्यक्ष पुष्पकमल दाहाललाई भेट्न खुमलटार पुगेका थिए। यसअघि स्थायी समिति सदस्य तथा लुम्बिनीका मुख्यमन्त्री शंकर पोखरेलले पनि हिजो खुमलटार नै पुगेर उनीसँग भेट गरेका थिए।