साझा पार्टी र विवेकशील नेपाली दलबीच एकता भएको छ ।
अलग भएको २२ महिनापछि साझाका संयोजक रविन्द्र मिश्र र विवेकशीलका मिलन पाण्डेले पार्टी एकताको सहमतिमा आज हस्ताक्षर गरेका हुन् ।
एकीकृत पार्टीको नाम विवेकशील साझा पार्टी राखिएको छ र चुनाव चिन्ह तराजु रहनेछ । एकीकृत पार्टीको अध्यक्षमा मिश्र र संयोजकमा पाण्डे चयन भएका छन् । १३० सदस्यीय केन्द्रीय समितिमा दुबै पक्षबाट ६५–६५ जना रहनेछन् ।
केन्द्रीय समितिको पहिलो बैठकले दुबै पक्षबाट १३–१३ जना रहने गरी २६ सदस्यीय केन्द्रीय सचिवालय गठन गरेको छ । एकीकृत पार्टीका संरचनाहरु गठन, पुनर्गठन र समायोजनको काम दुई महिनामा सक्ने र ६ महिनाभित्र एकता महाधिवेशन गर्ने एकता घोषणापत्रमा उल्लेख छ ।
यसअघि ११ साउन २०७४ मा तत्कालीन दुई पार्टीको एकता भएको थियो भने २७ पुस २०७५ मा फुटेका थिए ।
यस्तै अध्यक्ष मिश्रले आउँदो निर्वाचनमा जनताले आफूहरुलाई निर्विकल्प नेतृत्वका रुपमा चयन गर्ने विश्वास व्यक्त गरेका छन् ।
आज भएको एकता घोषणा कार्यक्रमलाई सम्बोधन गर्दै मिश्रले आफूहरुले विगतको गल्तीलाई सुधारेको बताए। यसैगरी संयोजक पाण्डेले विगतमा राजनीतिक दुर्घटना भएको भन्दै विगतबाट पाठ सिक्दै एकतामा आएको बताए ।