चितवन र बुटवलमा थप २ जना कोरोना संक्रमितको मृत्यु भएको छ ।

मकवानपुर हेटौडा उप महानगरपालिका न्यूरेनीका ७८ बर्षिय पुरुषको उपचारको क्रममा आज बिहान भरतपुर अस्पतालमा मृत्यु भएको हो ।

यो सँगै चितवनमा कोरोनाका कारण मृत्यु हुनेको संख्या २१ पुगेको छ । यस्तै, रुपन्देहीमा थप एकजना कोरोना संक्रमित पुरुषको मृत्यु भएको छ ।

बुटवल धागो कारखानामा सञ्चालित कोरोना विशेष अस्थायी अस्पतालमा गएराति सैनामैना नगरपालिका–७ रामापुरका ६० वर्षीय पुरुषको मृत्यु भएको हो ।

कोरोना संक्रमण पुष्टि भएपछि असोज १३ गते अस्पताल भर्ना भएका उनको उपचारका क्रममा गएराति पौने १२ बजेतिर मृत्यु भएको लुम्बिनी प्रादेशिक अस्पतालका सूचना अधिकारी डा. विष्णु गौतमले बताए ।

संक्रमित पुरुष दुई दिनदेखि भेन्टिलेटरमा उपचाररत थिए ।