काठमाडौं । कोरोना भाइरस संक्रमणका कारण काठमाडौं महानगपालिकामा अहिलेसम्म ५६ जनाको मृत्यु भएको छ ।
काठमाडौं महानगरपालिको सहरी स्वास्थ्य महाशाखाका अनुसार सोमबारसम्म ७ हजार २ सय ९ जना संक्रमित हुँदा ५६ जनाले ज्यान गुमाएका छन् ।
संक्रमितमध्ये ३ हजार ९२ जना कोरोनामुक्त भएर घर फर्केका छन् । सोमबारसम्म महानागरभित्र सक्रिय संक्रमितको संख्या ३ हजार ६ सय ९६ रहेको महाशाखाले जनाएको छ ।
कुन वडामा कति संक्रमित ?
महानगरपालिका अनुसार वडा १५ रहेको स्वयम्भु क्षेत्रमा सबैभन्दा बढी ६ सय ५९ जना संक्रमित फेला परेका छन् ।
त्यस्तै वडा नम्बर १६ बालाजु क्षेत्रमा ४ सय ८२ जनालाई संक्रमण पुष्टि भएको छ ।
महाराजगञ्ज क्षेत्र रहेको वडानम्बर ३ मा ४ सय १५, त्रिपुरेश्वर क्षेत्रस्थित वडानम्बर ११ मा ४ सय १४ , कालिमाटी क्षेत्र अवस्थित वडानम्बर १३ मा ३ सय ९१ , बागबजार क्षेत्र अवस्थित वडानम्बर २८ मा ३ सय ५४ जना संक्रमित पुगेका छन् ।
महानगरका अनुसार वडानम्बर ३२ कोटेश्वरमा ३ सय ८१, वडानम्बर २७ स्थित इनबहाल क्षेत्रमा २ सय ८९ जनामा कोरोना पुष्टि भएको छ।
कलंकी, कुलेश्वर, बल्खु रहेको वडानम्बर १४ मा ३ सय ५९, वडानम्बर १३ स्थित कालीमाटीमा ३ सय ९१ जना रहेका महानगरले जनाएको छ ।
बागबजार रहेको वडानम्बर २८ मा समेत ३ सय ५४, वडानम्बर १० बानेश्वरमा १ सय ९२ जनामा कोरोना पुष्टि भएको छ।
