विश्वमा कोरोना भाइरसबाट संक्रमित हुनेको संख्या अमेरिकापछि अब भारतमा धेरै भएको तथ्यांकले देखाएको छ।
यसअघि संक्रमित हुनेको संख्या भारतमा भन्दा ब्राजिलमा बढी थियो।
अहिले भारतमा कोरोना संक्रमित हुनेको सङ्ख्या ४२ लाख ८ हजार पुगेको छ भने त्यहाँ यही भारइसको कारण मृत्यु हुनेको संख्या ७१ हजार ७ सय पुगेको तथ्यांक सार्वजनिक भएको छ ।
हिजोसम्म दोस्रो स्थानमा रहेको ब्राजिलमा कोरोना संक्रमितको संख्या ४१ लाख ३६ हजार पुगेको छ तर ज्यान गुमाउनेको व्यक्तिको हिसावमा भारत तेस्रो स्थानमा रहेको छ । ब्राजिलमा १ लाख २६ हजार बढीले ज्यान गुमाउँदा भारतमा ७१ हजार ७ सय बढीले ज्यान गुमाएका छन् ।
ज्यान गुमाउनेको संख्यामा चौथौ स्थानमा रहेको मेक्सिकोमा ६७ हजार ५ सय बढीले ज्यान गुमाउँदा ६ लाख ३४ हजार बढी संक्रमित भएको बताइएको छ । जबकी संक्रमित संख्याको आधारमा उक्त देश आठौं नम्बरमा रहेको छ ।
देशको जनसंख्याको हिसाबले कोभिडका कारण मानिसको मृत्यु हुने संख्या तुलनात्मक रूपमा भारतमा कम मानिन्छ। तर तीव्र गतिमा भाइरसको सङ्क्रमण ग्रामीण भेगसम्म फैलिँदै गएपछि चिन्ता बढेको छ।
यसअघि आइतवार भारतमा एकैदिन थप ९० हजार मानिस कोरोना भाइरसबाट संक्रमित भएको तथ्यांक सार्वजनिक भएको थियो।