तनहुँको भानु नगरपालिका–६ का ३८ वर्षीय पुरुषलाई गत आइतबार कोरोना सङ्क्रमण पुष्टि भयो । घरमै अलग्गै कोठामा बसेका उनलाई बिहीबार मात्रै शुक्लागण्डकी नगरपालिकास्थित जिपी कोइराला राष्ट्रिय श्वासप्रश्वास उपचार केन्द्र बेलचौताराको आइसोलेशनमा लगियो ।“पहिला आइसोलेशनमा श्यया छैन भनियो । घरमै पनि सुरक्षित बसेको थिएँ । बुधबार साँझ यहाँ ल्याइएको छ,” उनले भने ।
ती पुरुषसँगै भानु–६ मा एकैदिन २२ जनालाई कोरोना सङ्क्रमण पुष्टि भएको थियो । सङ्क्रमण पुष्टि भएको पाँच दिन पुग्दासमेत पाँच जना सङ्क्रमित अझै घरमा बसिरहेका छन् । ती १७ जना सङ्क्रमितलाई बिहीबार दिउँसोसम्म आइसोलेशनमा पुर्याइएको छ । तीमध्ये १५ जनालाई जिपी कोइराला सो केन्द्रको आइसोलेशनमा र दुई जनालाई दमौली अस्पतालले सञ्चालन गरेको आइसोलेशनमा राखिएको भानु नगरपालिकाका स्वास्थ्य शाखा प्रमुख ऐश्वर्यचन्द्र भट्टराईले बताए । बाँकी तीन जनालाई पनि छिट्टै आइसोलेशनमा ल्याउने उनी बताउँछन् । “दुई जना सङ्क्रमितलाई घरमै बस्न उपयुक्त छ । उहाँहरुलाई होम आईसोलेसनमै राख्छौ,” उनले भने ।
पछिल्लो समय जिल्लामा होम क्वारेन्टिनमा बस्न दिँदा परिवारका सदस्यलाई पनि सङ्क्रमण भएको घटना सार्वजनिक भइरहेको छ । आइसोलेशनमा लैजाने भएपछि सङ्क्रमितलाई पाँच दिनसम्म पनि घरमै राख्नु गम्भीर लापरवाही हो । “आइसोलेशन भरिभराउ भएकाले लैजान ढिलाई भएका हो । सरकारले गरेको निर्णयमा पनि घरमै आइसोलेशनमा बस्न चाहनेलाई राख्ने भनिएको छ । तसर्थ लापरवाही भएको होइन,” उनले भने । नगरप्रमुखले सङ्क्रमितकै सहमतिमा घरमा राखिएको दावी गरे । उनले भने, “अस्पताल ल्याएर पनि औषधि गर्ने त केही पनि होइन, ज्वरो आए सिटामोल दिन्छन् । नत्र भने आराम गर्ने, खाना दिने हो ।”
कोरोना रोकथाम नियन्त्रण र व्यवस्थापनमा स्थानीय तह लागिपरेको ६ महिना हुँदा समेत पर्याप्त आइसोलेशन छैन । पालिकामै आइसोलेशन बनाएर राख्दा सङ्क्रमितलाई जटिल समस्या देखिए सम्बन्धित अस्पताल लैजान टाढा पर्ने भएकाले भानुमा आइसोलेशन नबनाएको स्थानीय जनप्रतिनिधि बताउँछन् ।
