सरकारले कोरोना सक्रिय संक्रमित २ सयभन्दा बढी जिल्लामा आवतजावत बन्द गरेको छ । सोमबार बसेको मन्त्रिपरिषद् बैठकले यस्तो निर्णय गरेको हो ।
सरकारका प्रवक्ता अर्थ तथा सूचनामन्त्री डा. युवराज खतिवडाले सरकार लकडाउनको अवस्थामा नफर्किएको बताउँदै २ सय भन्दा बढी सक्रिय संक्रमित भएका जिल्लामा आवतजावत बन्द गरिएको बताए ।
उनका अनुसार काठमाडौं उपत्यकाका तीन जिल्लाबाहेकका जिल्लामा यो नियम लागु हुनेछ । ती जिल्लामा आवातजावत गर्नुपरेमा सम्बन्धित स्थानीय प्रशासनको अनुमति लिनुपर्नेछ । जिल्ला प्रशासन कार्यालयले पनि कारण खुलाएर अत्यावश्यक कामका लागि मात्रै पास जारी गर्नुपर्ने निर्णय सरकारले गरेको छ ।
एक हप्ताअगाडी सरकारले २०० भन्दा बढी संक्रिय संक्रमित भएका जिल्लाहरुमा जोर बिजोरसँगै बेलुका ९ बजेदेखि बिहान ५ बजेसम्म हिडडुलमा रोक लगाएको थियो । अहिले आएर ती जिल्लाहरुमा आवातजावत नै बन्द गरिएको सरकारका प्रवक्ता अर्थ तथा सूचनामन्त्री डा. युवराज खतिवडाले बताए ।