भारतको विहारबाट काठमाडौं आएका एक परिवारका पाँच जनामा कोरोना संक्रमणको पुष्टी भएको छ।
उनीहरुको शुक्रराज ट्रपिकल तथा सरुवा रोग अस्पतालमा परीक्षणको क्रममा कोरोना पुष्टि भएको हो।
अस्पतालले उपलव्ध गराएको विवरण अनुसार भारतबाट आएकी एक महिलामा बिहिबार कोरोना पुष्टि भएको थियो। कन्ट्रयाक्ट ट्रेसिङ गर्ने क्रममा शुक्रबार अन्य सदस्यको परीक्षण गर्दा सबैमा कोरोना देखिएको हो। परिवारका दम्पत्ति,छोरा–छोरी र नातिनीमा कोरोना देखिएको नाम नखुलाइदिने सर्तमा टेकु अस्पतालका एक चिकित्सकले जानकारी दिए।
१५/२० दिन अगाडि मात्र छोरी र नानीति बिहारबाट काठमाडौं आएका थिए। स्वास्थ्यमा समस्या देखिएपछि उनलाई टेकु अस्पताल लगिएको थियो।
उनीहरु महाबौद्ध काठमाडौमा पसल व्यवसाय गर्नेहरु रहेको राष्ट्रिय इपिडिमोलोजी तथा रोग नियन्त्रण महाशाखा सर्भिलेन्स शाखाका जनस्वास्थ्य अधिकृत महेन्द्र ध्वज अधिकारीले बताए। संक्रमित परिवारको महावौद्ध गणेश मन्दिर नजिकै अन्डरगार्मेन्ड पसल छ।
स्थानीयमा त्रास
काठमाडौंको महाबौद्ध गणेश मन्दिर नजिक पसल चलाउने दुई व्यापारीलाई कोरोना संक्रमण भएपछि त्यस क्षेत्रमा त्रासको स्थिति सिर्जना भएको छ । व्यापार गर्ने ती व्यक्तिहरुको संसर्गमा रहेका व्यक्तिहरूलाई पिसिआर परीक्षण गराउन सूचना जारी भएपछि त्यस क्षेत्रमा त्रासको स्थिति सिर्जना भएको हो ।
जारी सूचनामा गणेश मन्दिरदेखि महाबौद्ध स्तुपा व्यवसाय गर्नेको पिसिआर परीक्षणको रिपोर्ट नआएसम्म सुरक्षाको उपाय अपनाउन अपिल गरिएको छ ।
आइतबार काठमाडौंमा ८ कोरोना संक्रमित
काठमाडौंमा आज (आइतबार) ८ जना नयाँ कोरोना संक्रमित थपिएका छन् । स्वास्थ्य तथा जनसंख्या मन्त्रालयका प्रवक्ता डा.जागेश्वर गौतमले पछिल्लो २४ घण्टामा काठमाडौंमा ८ जना कोरोना संक्रमित थपिएका जानकारी दिए ।
गौतमका अनुसार राष्ट्रिय जनस्वास्थ्य प्रयोगशालामा गरिएको परीक्षणमा काठमाडौंका दुई जना कोरोना संक्रमित भेटिएका छन् । शुक्रराज ट्रपिकल तथा सरुवा रोग अस्पताल टेकुमा गरिएको परीक्षणमा काठमाडौंका ३ जनामा कोरोना हुन् । जसको बारेमा माथि समाचारमा बताइएको छ ।
त्यस्तै स्टार अस्पताल सानेपामा काठमाडौंका ३ जनामा कोरोना देखिएको छ ।
हालसम्म काठमाडौंमा २८६ जनामा कोरोना संक्रमित भेटिएका मन्त्रालयले जनाएको छ ।
