शनिवार राती कोरोना संक्रमित बनेका बलिउडका सुपरस्टार अमिताभ बच्चन र उनको छोरा अभिषेक बच्चनलाई स्वास्थ्यलाभको शुभकामना दिनेको घुइचो नै लागेको छ ।
अमिताभ बच्चन र अभिषेक बच्चनलाई कोरोना संक्रमण देखिएसँगै देशविदेशमा रहेका उनीहरुका फ्यान चिन्तित बनेका छन् । ती फ्यानहरुले सामाजिक सञ्जालमार्फत वच्चन परिवारमा स्वास्थ्य लाभको कामना गरिरहेका छन् ।
भारतीय फिल्म उद्योगका हस्तीहरुले पनि अमिताभ र अभिषेकको स्वास्थ्य लाभको कामना गर्दै तस्वीरहरु पोस्ट गरिरहेका छन् ।
कोरोना संक्रमण देखिएसँगै अहिले अमिताभ र अभिषेकको उपचार जारी रहेको छ । यसैबीच अभिताभ र अभिषेकको स्वास्थ्यलाभको कामना गर्दै भारतमा विशेष पूजा थालिएको विभिन्न सञ्चारमाध्यमहरुले जनाएका छन् ।
हिन्दूस्तान टाइम्सका अनुसार अमिताभ र अभिषेकको स्वास्थ्य लाभको कामना गर्दै मध्यप्रदेशस्थित उज्जैनको एक मन्दिरमा विशेष पूजा गरिएको छ । एएनआईले राखेको तस्वीरमा अमिताभको स्वास्थ्य लाभको कामना गर्दै शिव लिं-गमा अभिषेक गरिएको छ ।
अमिताभ आफैले सामाजिक सञ्जाल फेसबुक र ट्विटरबाट आफू कोरोना पोजेटिभ भएको जानकारी दिएका हुन् । आफ्नो फ्यानलाई सान्तवना दिँदै उनले लेखका छन्, ‘मेरो कोभिड-१९ परीक्षण पोजेटिभ आएको छ।
म अस्पताल भर्ना भएको छु। परिवारका बाँकी सदस्यको र कर्मचारीहरूको पनि कोरोना परीक्षण भएको छ।
उनीहरूको नतिजा आउन बाँकी छ।’
‘कोरोना पोजेटिभ भएर बच्चन राती १० बजे अस्पताल भर्ना भएका हुन्।
उनको अवस्था सामान्य छ। उनको विस्तृत स्वास्थ्य अवस्था पत्ता लगाउन आवश्यक परीक्षण जारी छन्,’ भारतीय समाचार माध्यम द हिन्दूसँग कुराकानी गर्दै ती डाक्टरले भनेका छन्।
गत महिना मात्र अमेजन प्राइम भिडियोमा रिलिज भएको गुलाबो सिताबोमा ७७ वर्षीय बच्चनसमेतको अभिनय छ।
उनको रोल भएको यो पछिल्लो सिनेमा हो।
बाबुर र छोरालाई कोरोना पोजेटिभ भएतापनि अभिनेत्री एेश्वर्या राय वच्चन र जया बच्चनको रिपोर्ट भने नेगेटिभ आएको छ । घरमा काम गर्ने कर्मचारीमा पोजेटिभ देखिएपछि मुम्बइमा उनीहरु बस्ने घर शिल गरिएको समाचारमा बताइएको छ ।
