सरकारले विदेशबाट अप्ठेरोमा परेका नेपालीलाई स्वदेश फर्काइरहेका बेला कतिपय देशमा पुगेका नेपाली एयरलाइन्सहरु रित्तै फर्किइरहेका छन्।
लकडाउन सुरू भएयता नेपाल एयरलाइन्सले २५ वटा अन्तारिष्ट्रय चार्टर्ड उडान भरेको नेपाल वायुसेवा निगमले जानकारी दिएको छ ।
यो अवधिमा अष्ट्रेलिया ३ पटक, चीन ९ पटक, हङकङ ३ पटक, दिल्ली १ पटक, ढाका १ पटक र जापान ८ पटक चार्टर्ड उडान भरेको निगमको तथ्यांकमा छ । नेपाल एयरलाइन्सले चार्टर्ड उडान भरेको देशबाट करिब ५ हजार नागरिक उद्धार गर्नुपर्ने परराष्ट्र मन्त्रालयले जनाएको छ ।
लकडाउन भएयता गरेका अन्तर्राष्ट्रिय चार्टर्ड उडान रित्तै फर्किएका छन् ।
बिहीबार विमान भरेर त्रिभुवन विमानस्थलबाट जापानको नारिता उडेको नेपाल एयरलाइन्स फर्कँदा रित्तैजस्तै आउँदै छ।
विमानस्थल स्रोतका अनुसार साढे २ बजे नेपाल आईपुग्ने उक्त विमानमा ६ जना यात्रु छन्।
यसअघि गत साता नेपाल एयरलाइन्सले जापानबाट ७ जना यात्रु लिएर आएको थियो। त्यतिबेला पनि नेपाल एयरलाइन्सले विमान भरि यात्रु लिएर नेपालबाट नारिता पुगेको थियो।
सअघि लकडाउनकै बीचमा २ पटक अष्ट्रेलियामा पुगेर रित्तै फर्किएको जहाज यसपटक भने पूरै भरिएर फर्किन्छ भन्ने अपेक्षा गरिएपनि रित्तै आएको हो । सरकारले विदेशमा रोकिएको नेपाली नागरिकको उद्दार सुरु गरिसकेका कारण अष्ट्रेलिया पुगेको निगमको वाइडबडी ए३३० जहाजले करिब २७४ जना यात्रु ल्याउने अपेक्षा थियो । तर जहाज जम्मा ११ जना यात्रु मात्रै बोकेर आईपुग्यो । अस्ट्रेलिया उद्धारको प्रतीक्षामा १ हजार ६ सय नेपाली नागरिक छन् ।
सरकारले राम्रोसँग समन्वय नगर्दा विमानहरु रित्तै फर्किइरहेका छन्। पछिल्लो तथ्यांकअनुसार अमेरिकामा एक हजार र अस्ट्रेलियामा करिब १४ सय जनाले नेपाल फर्कने भन्दै फर्म भरेका छन्।
तीनै देशबाट फर्कन चाहने नेपालीका लागि सरकारले महँगो टिकट शुल्क निर्धारण गरेको छ। विमान रित्तै गएर यात्रु ल्याउनुपर्ने हुँदा टिकट शुल्क महँगो भएको सरकारको भनाई छ।