गैरआवासीय नेपाली सङ्घ (एनआरएनए) ले कोरोना भाइरस सङ्क्रमणका कारण विदेशमा रहेका नेपालीको मृत्यु र सङ्क्रमणको दर उल्लेख्य कमी आएको जनाएको छ ।
शनिबार साँझसम्म विदेशमा १ सय २५ जनाको सो सङ्क्रमणबाट मृत्यु भएको र पाँच हजार ५ सय ९० जना सङ्क्रमण मुक्त भएका छन् । सङ्क्रमण दर गतसाता भन्दा ७५ प्रतिशतले कमी आएको जनाइएको छ ।
एनआरएनएका संयोजक डा. सञ्जीव सापकोटाका अनुसार गत हप्ता कतारमा चारजना, कुबेत र युकेमा एक-एक गरी ६ जनाले ज्यान गुमाएका थिए ।
विश्वका ३४ देशमा रहेका नेपालीहरु कोरोना भाइरसबाट प्रभावित भएका सो सस्थाले जनाएको छ । सो भाइरसका कारण बेलायत, संयुक्त राज्य अमेरिका, युएई साउदी अरब, बहराइन, कुबेत, कतार, आयरल्याण्ड, जापान, टर्की, नेदरल्याण्ड र स्विडेनमा रहेका नेपालीहरुको मृत्यु भएको हो ।
संयोजक सापकोटाका अनुसार विदेशमा १४ हजार ४ सय ५४ जना नेपाली कोरोनाबाट सङ्क्रमित भएका छन् । यो संख्या धेरै हुनसक्ने अनुमान गरिएको छ । कति देशहरुको एकिन तथ्यांक पाउन समस्या भएको र धेरै राष्ट्रहरुले संङक्रमित व्यक्तिहरुको राष्ट्रियता नखुलाएको कारण संख्या अझै बढी हुनसक्ने एनआरएनए ले स्विकार गरेको छ ।