विश्वभर महामारीको रुप लिएको कोरोना भाइरसको संक्रमण पछिल्ला केहि दिनमा नेपालमा पनि वढ्दो क्रममा देखिएको छ । चैत ११ गतेदेखि देश नै ‘लकडाउन’मा भएतापनि कोरोना संक्रमितको संख्या दिनहुँ बढ्दै गएको पाइन्छ ।

आज (शनिबार) पनि नेपालमा थप ३२ जनामा कारोना पुष्टि भएको छ । योसँगै नेपालमा कोरोना संक्रमित संख्या ५४८ पुगेको छ । शनिबार थपिएका ४ जना कपिलवस्तुका छन् भने प्रदेश १ मा ११ जना रहेका छन् ।

राष्ट्रिय जनस्वास्थ्य प्रयोगशाला, काठमाडौंको र भरतपुर अस्पताल चितवन, कोशी अस्पतालको प्रयोगशालामा गरिएको परीक्षणमा ९ जना र बीपी कोइराला स्वास्थ्य प्रतिष्ठानमा गरिएको परीक्षणमा २ जना गरी ११ जनामा कोरोना पुष्टि भएको छ । प्रदेश १ मा पुष्टि भएका ११ मध्ये ९ जना झापाको केचना कवलका छन् भने दुईजना सुनसरीका रहेका छन् ।

कुल संक्रमितमध्ये ३ जनाको मृत्यु भइसकेको छ भने ७० जना निको भएर घर फर्किएका छन् । कोरोना संक्रमणबाट सिन्धुपाल्चोककी २९ वर्षीया सुत्केरी महिला, बाँकेका २५ वर्षीय युवक र गुल्मीका ४१ वर्षीय पुरुषको‍‍ मृत्यु भएको छ ।