नेकपाको पुष्पकमल दाहाल प्रचण्ड र माधवकुमार नेपाल समूहले प्रधानमन्त्री केपी ओलीले राखेको ‘पावर सेयरिङ’ को प्रस्ताव अस्वीकार गर्ने भएको छ ।
बुधबारको सचिवालय बैठकमा ओलीले पार्टी विवाद समाधान गर्न एक अध्यक्ष थप गर्ने र नेता नेपाललाई तेश्रो अध्यक्ष तथा वामदेव गौतमलाई प्रधानमन्त्री प्रस्ताव गरेका थिए । सचिवालय बैठकको मुल मुद्दामा केन्द्रित हुने ठानिएको सचिवालय बैठकमा ओलीको प्रस्तावले नेताहरुको ‘दिमाग खराब’ गरेको थियो ।
तर, ओलीले पार्टीभित्र संगठित रुपमा भएको आफूविरुद्धको घेराबन्दी भत्काउन ओलीले कुटितापूर्वक त्यस्तो प्रस्ताव राखेको बुझाई प्रचण्ड–नेपाल समूहको छ । ‘ओलीजीले सत्ता नछाड्न फाल्नुभएको कार्ड हो’, एक स्थायी समिति सदस्यले भने, ‘हामी यो भ्रममा छैनौं, उहाँले प्रधानमन्त्री नछानेसम्म समस्या समाधान हुँदैन ।’
२० गते बस्ने सचिवालयको अर्को बैठकमा प्रचण्ड–नेपाल समूहले पुनः ओलीको राजीनामा माग्ने तयारी गरेको छ । नेकपाभित्रको अहिलेको समस्या पावर सेयरिङ नभएर नभई ओलीको स्वेच्छाचारी कार्यशैली र पार्टीलाई बाइपास गर्ने प्रवृत्तिका कारण भएकाले उनले निकास दिनुपर्ने ती नेताले स्पष्ट गरे ।
