काठमाडौं, २ वैशाख । विश्वमा कोरोना भाइरस अर्थात् कोभिड-१९ को संक्रमणबाट ज्यान गुमाउनेको संख्या एक लाख १९ हजार नाघेको छ । विभिन्न तथ्याङ्क निकाल्ने संस्था वर्ल्डो मिटर्स डट इन्फोका अनुसार मंगलबार बिहानसम्म कोरोना भाइरसबाट मृत्यु हुनेको संख्या १ लाख १९ हजार ६ सय ९१ पुगेको छ ।
संक्रमण हुनेको संख्या भने १९ लाख २४ हजार ६सय ६२ पुगेको छ । सङ्क्रमितमध्ये ४ लाख ४५ हजार ५ जना भने उपचारपछि घर फर्किएका छन् । अहिले १३ लाख ५९ हजार ९ सय ६६ जनामा कोरोना भाइरस सक्रिय देखिएको छ । तीमध्ये ५१ हजार ७ सय ४२ जनाको अवस्था भने गम्भीर रहेको छ ।
कोरोनाको उद्गम स्थल चीन भए तापनि कोरोना संक्रमणबाट सबैभन्दा बढी मृत्यु हुनेमा अमेरिका, इटाली, स्पेन त्यसपछि फ्रान्स पर्छ । वर्ल्डो मिटर्स डट इन्फोका अनुसार अमेरिकामा २३ हजार ६ सय ४० जनाले कोरोनाका कारण ज्यान गुमाइसकेका छन् ।
अमेरिकामा पछिल्लो २४ घण्टामा मात्रै १५ सय बढीको मृत्यु भएको छ भने २६ हजारभन्दा बढी नयाँ संक्रमित भेटिएका छन् । अहिलेसम्म त्यहाँ ५ लाख ८६ हजार ९ सय ४१ पुगेको छ । तीमध्ये ३६ हजार ९ सय ४८ जना भने निको भइसकेका छन् । अहिले त्यहाँ ५ लाख २६ हजारभन्दा बढीमा कोरोनाको सक्रिय रहेको छ । संक्रमितमध्ये १२ हजार ७ सय ७२ जनाको अवस्था भने गम्भीर रहेको छ ।
अमेरिकापछि कोरोनाका कारण सबैभन्दा बढी मृत्यु हुने देशमा इटाली पर्छ । अहिलेसम्म इटालीमा कोरोनाका कारण २० हजार ४ सय ६५ जनाको मृत्यु भइसकेको छ । अहिलेसम्म त्यहाँ १ लाख ५९ हजारभन्दा बढीमा कोरोनाको संक्रमण भएको छ । सोमबार मात्रै इटालीमा ३ हजार बढी नयाँ कोरोना संक्रमित भेटिएका छन् भने ५ सय ६६ जनाको मृत्यु भएको छ । संक्रमितमध्ये ३५ हजार ४ सय ३५ जना भने पूर्णरूपमा निको भइसकेका छन् ।
कोरोनाले भयवह पारेको अर्को देश हो स्पेन । यहाँ संक्रमितको संख्या इटालीमा भन्दा पनि धेरै पुगेको छ । स्पेनमा अहिलेसम्म कोरोनाका कारण १७ हजार ७ सय ५६ जनाको ज्यान गइसकेको छ भने १ लाख ७० हजार भन्दा बढी संक्रमित भएका छन् । पछिल्लो २४ घण्टामा मात्रै स्पेनमा ५ सय ४७ जनाको ज्यान गुमाएका छन् भने ३ हजार भन्दा बढी थप नयाँ संक्रमित भेटिएका छन् ।
संक्रमितमध्ये ६४ हजार ७ सय २७ जना पूर्णरूपमा निको भएका छन् । अहिले स्पनेमा ८७ हजार ६ सय १६ जनामा कोरोना सक्रिय रहेको वर्ल्डे मिटर्सले जनाएको छ । तीमध्ये ७ हजार ३ सय ७१ जनाको अवस्था भने गम्भीर रहेको छ ।
कोरोना संक्रमण हुने देशमा चीनभन्दा अगाडि जर्मनी, फ्रान्स र बेलायत पनि रहेको छ । फ्रान्समा अहिलेसम्म कोरोना संक्रमितको संङख्या १ लाख ३६ हजार नाघेको छ भने मृत्यु हुनेको संख्या १४ हजार ९ सय ६७ पुगेको छ । सोमबार मात्रै त्यहाँ ५ सय ७४ जनाको मृत्यु भएको छ । संक्रिमतमध्ये २७ हजार ७ सय १८ जना भने पूर्णरूपमा निको भइसकेका छन् । अहिले त्यहाँ ९४ हजार भन्दा बढी मानिसहरुमा कोरोना संक्रिय रहेको छ । तीमध्ये ७ हजारको अवस्था भने गम्भीर रहेको छ ।
जर्मनीमा अहिलेसम्म कोरोना संक्रमित हुनेको संख्या १ लाख ३० हजार नाघेको छ । तीमध्ये ६४ हजार ३ सय भने पूर्णरूपमा निको भइसकेका छन् । अहिले त्यहाँ ६२ हजार ५ सय ७८ जनामा कोरोना सक्रिय रहेको छ । करिब ५ हजार जना भने गम्भीर अवस्थामा रहेका छन् । अहिलेसम्म त्यहाँ ३ हजार १ सय ९४ जनाले कोरोनाका कारण ज्यान गुमाएका छन् ।
बेलायमा कोरोनाका कारणा अहिलेसम्म ११ हजार ३ सय २९ जनाको ज्यान गइसकेके छ । सोमबार मात्रै बेलायतमा ७ सय १७ जनाको मृत्यु भएको छ । संक्रमितको संख्या भने ८८ हजार ६ सय २१ पुगेको छ ।
कोरोनाको उद्गम स्थल चीन भने अहिले ११ सयको हाराहारीमा मात्रै कोरोना सक्रिय रहेको छ । त्यहाँ ७७ हजार ६ सय ६३ जना पूर्णरूपमा निको भइसकेका छन् । चीनमा अहिलेसम्म कुल ८२ हजार १ सय ६० जनामा कोरोनाको संक्रमण देखिएको छ ।